بی جے پی دھاندلی اور بے ایمانی کے ذریعے دہلی الیکشن لڑنا چاہتی ہے : کیجریوال

نئی دہلی// عام آدمی پارٹی (آپ) کے قومی کنوینر اروند کیجریوال نے آج کہا کہ بھارتیہ جنتا پارٹی (بی جے پی) دھاندلی اور بے ایمانی کے ذریعے دہلی انتخابات لڑنا چاہتی ہے ۔
مسٹر کیجریوال نے آج کہا کہ پٹ پڑ گنج سے ہمارے امیدوار اودھ کمار اوجھا کا ووٹ گریٹر نوئیڈا میں بنا ہوا تھا ۔ انھوں نے 26 دسمبر کو فارم 6 بھر کر دہلی میں ووٹر لسٹ میں نام شامل کرنے کے لیے درخواست دی تھی، لیکن انھیں کوئی جواب نہیں ملا۔ کسی نے انہیں بتایا کہ چونکہ ان کا ووٹ گریٹر نوئیڈا میں ہے ، اس لیے انہیں اپنا ووٹ ٹرانسفر کرنے کے لیے فارم 6 نہیں بلکہ فارم 8 بھرنا ہوگا۔ انہوں نے 7 جنوری کو فارم 8 بھرا۔ قانون کے مطابق 7 جنوری فارم 8 داخل کرنے کی آخری تاریخ تھی۔ الیکشن کمیشن کے مینول میں کہا گیا ہے کہ فارم 6، فارم 7، فارم 8 کاغذات نامزدگی کی آخری تاریخ سے 10 دن پہلے تک بھرا جا سکتا ہے ۔
انہوں نے کہا کہ دہلی کے الیکشن افسر نے ایک حکم جاری کیا ہے جس میں کہا گیا ہے کہ 7 جنوری فارم 8 بھرنے کی آخری تاریخ ہے لیکن ایک دن بعد پراسرار طور پر انہوں نے دوبارہ حکم جاری کرتے ہوئے کہا کہ 6 جنوری آخری تاریخ ہے ۔ یہ دوسرا حکم کیوں جاری کیا گیا؟ یہ قانون کے خلاف ہے ۔ یہ الیکشن کمیشن کے گائیڈ لائنز اور مینوئل کے خلاف ہے ۔ کیا یہ حکم اودھ اوجھا کو انتخابات سے باہر کرنے کے لیے جان بوجھ کر جاری کیا گیا؟
مسٹر کیجریوال نے کہا کہ الیکشن کمیشن کے مینول میں کہا گیا ہے کہ اگر کوئی فارم 8 یعنی ووٹ ٹرانسفر کی درخواست آخری تاریخ کے بعد بھی آتی ہے تو الیکشن کمیشن اس پر غور کرسکتا ہے ۔ لیکن ہمارے لیے یہ امیدوار کی امیدواری کا سوال ہے اور اس میں کسی قسم کی کوئی بے ضابطگی نہیں ہے ۔ مسٹر اوجھا کا ووٹ گریٹر نوئیڈا سے دہلی منتقل ہونا ہے اس لیے آج ہم چیف الیکشن کمشنر سے ملاقات کریں گے اور ان سے درخواست کریں گے کہ اودھ اوجھا کا ووٹ ٹرانسفر کرایا جائے تاکہ وہ اپنا پرچہ نامزدگی داخل کر سکیں۔