زیڈ موڑ ٹنل کا افتتاح:مقامی لوگوں کو سیاحت کے فروغ کی امید

گاندربل//
ضلع گاندربل کے باشندے جو سرینگر سونمرگ شاہراہ پر۵ء۶ کلومیٹر طویل زیڈ موڑ ٹنل کے دونوں طرف رہتے ہیں، پرامید ہیں کہ میگا انفراسٹرکچر پروجیکٹ سے مقامی معیشت کو فروغ ملے گا اور علاقے میں بے روزگاری کے خاتمے میں مدد ملے گی۔
مقامی لوگوں نے کہا کہ یہ اچھی بات ہے کہ زیڈ موڑ ٹنل جلد ہی کھل جائے گی جس سے مقامی افراد کو بہت فائدہ ہوگا۔ موسم سرما میں سونمرگ میں دلفریب موسم ہوتا ہے، لیکن سڑک بند ہونے کی وجہ سے سیاحوں کی آمد و رفت متاثر ہوئی۔
ایک مقامی دکاندار محمد یوسف شیرا نے کہا کہ ہم اس سرنگ کے لیے حکومت کے شکر گزار ہیں۔
شیرا کا ماننا ہے کہ سرینگر اور سونمرگ کے درمیان سال بھر رابطے سے منزل کی عالمی مقبولیت میں اضافہ ہوگا۔ انہوں نے کہا کہ سونمرگ اب نہ صرف ملک میں بلکہ پوری دنیا میں مشہور ہوگا۔ مجھے لگتا ہے کہ غیر ملکی وں کو یہ جگہ پسند آئے گی۔
اسٹریٹجک اہمیت کو اجاگر کرتے ہوئے شیرا نے کہا کہ سرنگ سے مسلح افواج کو بھی فائدہ ہوگا۔انہوں نے کہا کہ سرحدوں پر ملک کا دفاع کرنے والے فوجیوں کے لئے سہولیات ہونی چاہئیں۔ یہ ٹنل فوجیوں کو بہتر رابطے کے معاملے میں سہولت فراہم کرے گی۔
زیڈ موڑ ٹنل نے سرینگر اور سونمرگ کے درمیان سفر کے وقت کو کم کردیا ہے جس سے گاڑیوں کو ۷۰ کلومیٹر فی گھنٹہ کی رفتار سے سفر کرنے کی اجازت مل گئی ہے۔ ٹنل میں فی گھنٹہ ایک ہزار گاڑیوں کو سنبھالنے کی گنجائش ہے۔
اس پروجیکٹ کا افتتاح پیر کو وزیر اعظم نریندر مودی کریں گے، جو اسمبلی انتخابات کے بعد مرکز کے زیر انتظام علاقے کا ان کا پہلا دورہ ہے۔
ایک مقامی شخص شبیر احمد نے بتایا کہ یہ سرنگ سونمرگ تک سال بھر رسائی کو یقینی بناتی ہے۔
احمد نے کہا’’ہمیں خوشی ہے کہ اب سیاح پورے سال سونمرگ آ سکتے ہیں۔ اس سے قبل برف باری کی وجہ سے یہ علاقہ چار ماہ تک منقطع رہا تھا۔ اب نہ صرف سونمرگ بلکہ دراس اور کارگل جیسے علاقے آپس میں جڑے رہیں گے‘‘۔
ان کاکہنا تھا’’اس علاقے کے لوگ غریب ہیں لیکن یہ سرنگ اب سال بھر روزگار کے مواقع فراہم کرے گی‘‘۔
ایسے ہی خیالات کا اظہار کرتے ہوئے ایک ٹورسٹ گائیڈ فیاض احمد شیخ نے کہا کہ ٹنل کے افتتاح سے علاقے میں بے روزگاری کے مسئلے کو حل کرنے میں مدد ملے گی۔انہوں نے بتایا کہ وہ گزشتہ کئی سالوں سے یہاں ٹورسٹ گائیڈ کے طور پر کام کر رہے ہیں۔ تاہم برفباری کی وجہ سے سڑکوں کی بندش کی وجہ سے سیاحتی سیزن صرف چھ ماہ تک محدود رہا۔
شیخ نے کہا کہ یہ ٹنل سال بھر سیاحوں کو لائے گی، مقامی لوگوں کو بہتر سہولیات اور آمدنی کے زیادہ مواقع فراہم کرے گی۔
ناگپور کے سیاحوں کے ایک گروپ نے، جو ہفتہ کے روز گگن گیر کا دورہ کرنے میں کامیاب رہے تھے، اس پروجیکٹ کی ستائش کی اور اسے ایک اچھا قدم قرار دیا۔ان کاکہنا تھا’’ہم یہ دیکھ کر حیران ہیں کہ اتنی خوبصورت جگہ ہندوستان میں ہی ہے۔ ہم اس سرنگ کی وجہ سے یہاں تک پہنچنے میں کامیاب ہوئے ہیں، ورنہ ہم اس خوبصورت نظارے سے محروم ہو جاتے‘‘۔
سیاحوں نے مزید کہا کہ بہت سے لوگ پہلے ہی کشمیر کا دورہ کر رہے ہیں لیکن ہم اپنے تمام دوستوں اور اہل خانہ کو کم از کم ایک بار اس جگہ کا دورہ کرنے کی سفارش کریں گے۔
زیڈ موڑ ٹنل پر کام مئی ۲۰۱۵ میں شروع ہوا تھا۔ کام مکمل کرنے میں تقریبا ایک دہائی لگ گئی کیونکہ انفراسٹرکچر لیزنگ اینڈ فنانشل سروسز (آئی ایل اینڈ ایف ایس) نے مالی دباؤ کی وجہ سے ۲۰۱۸ میں کام روک دیا تھا۔
اس منصوبے کو ۲۰۱۹ میں دوبارہ ٹینڈر کیا گیا اور جنوری۲۰۲۰ میں اے پی سی او انفراٹیک کو دیا گیا تھا ، جو سب سے کم بولی لگانے والے کے طور پر ابھرا تھا۔
۹۰ء۲۷۱۶ کروڑ روپے کے اس پروجیکٹ کا سنگ بنیاد اکتوبر ۲۰۱۲ میں یو پی اے ۲حکومت کے دوران اس وقت کے زمینی ٹرانسپورٹ کے وزیر سی پی جوشی نے اپنے اس وقت کے کابینہ ساتھی فاروق عبداللہ، جموں و کشمیر کے اس وقت کے وزیر اعلی عمر عبداللہ اور کانگریس رکن پارلیمنٹ راہل گاندھی کی موجودگی میں رکھا تھا۔
ابتدائی طور پر یہ سرنگ ۲۰۱۶۔۲۰۱۷ تک مکمل ہونے کی توقع تھی۔