بی جے پی کی نوپور شرما کیخلاف ویڈیو اپ لوڈ کرنے پر پائین شہر کا یوٹوبر گرفتار

سرینگر//
سرینگر کے صفا کدل کے رہنے والے یوٹوبر‘ فیصل وانی کو جموں کشمیر پولیس نے ہفتے کے روز بھارتیہ جنتا پارٹی کی معطل ترجمان نوپور شرما کا گرافکس ویڈیو بنانے کے الزام میں گرفتار کر لیا ہے۔
اس گرافک ویڈیو میں وہ نوپور شرما کا سر قلم کرنے ترغیب دے رہا ہے۔ وانی نے تاہم یہ ویڈیو ہٹادی اور اس پر معافی بھی مانگی۔
سرینگر پولیس کے سینئر سپرانٹنڈنٹ‘ راکیش بلوال نے ایک نیوز چینل کوبتایا’’وانی صفا کدل کے رہنے والے ہیں اور اسے آج وہیں سے گرفتار کر کے صفا کدل تھانے میں رکھا گیا ہے‘‘۔ اْنہوں مزید کہا’’فیصل کو امن وامان بگاڑنے سے متعلق قانونی دفعات۵۰۶‘۵۰۵ کے تحت گرفتار کیا گیا ہے‘‘۔
وہیں راکیش بلوال نے عوام سے کی کہ تشدد کو ہوا دینے والے ویڈیوز یا پوسٹس سوشل میڈیا پر شائع کرنے سے پرہیز کریں۔
وانی کا یہ ویڈیو خوب وائرل ہوگیا جس کے بعد اسکے خلاف ٹوٹر پر ایک مہم چلائی گئی۔ بعد میں وانی ’جو دیپ پین فٹنیس‘ نام سے یوٹیوب چینل چلاتے ہیں، نے اپنے ویڈیو کے لیے معافی بھی مانگی۔
اپنے معافی والے ویڈیو میں وانی نے کہا تھا ’’میرا ویڈیو کچھ ہی دیر میں وائرل ہو گیا تھا۔ ہاں ویڈیو میں نے بنائی ہے لیکن میرا کوئی برا ارادہ نہیں تھا۔ میں نے ویڈیو ڈیلیٹ کر دی ہے اور اگر کسی کو تکلیف پہنچی ہو تو میں معذرت خواہ ہوں‘‘۔
وانی نے معافی والے ویڈیو کو بھی وائرل کرنے کی اپیل کی۔
مسلم علماء کی جانب سے اپیل کی جارہی ہے کہ نوجوان نوپور شرما کے اہانت آمیز بیان کے ردعمل میں تہزیب و شائستگی کے دامن کو تھامے رکھیں اور ایسی کوئی حرکت نہ کریں جس سے مسمانوں کے کردار پر کوئی آنچ آجائے۔ دانشوروں نے تاہم حکومت سے اپیل کی کہ نوپور شرما کو فوراً گرفتار کیا جانا چاہئے۔
ابھی تک نوپور شرما کی گستاخانہ باتوں کے ردعمل میوں ہونے والے ملک گیر احتجاج میں کم از کم دو افراد ہلاک ہوگئے ہیں جبکہ درجنوں زخمی ہوئے ہیں۔
پولیس نے گزشتہ روز نماز جمعہ کے بعد جھارکھنڈ کے دارالحکومت رانچی میں طاقت کا استعمال کیا اور دو مسلم احتجاجیوں کو ہلاک کردیا۔