سنہا کا یوٹی میں تین نئے فوجداری قوانین کی عمل آوری کا جائزہ

جموں //
لیفٹیننٹ گورنر‘ منوج سِنہا نے آج جموںکشمیر یوٹی میں تین نئے فوجداری قوانین‘ بھارتیہ نیائے سنہتا۲۰۲۳، بھارتیہ ناگرک سرکشا سنہتا۲۰۲۳ ؍اور بھارتیہ ساکشیہ ادھینیم ۲۰۲۳ کی عمل آوری کا جائزہ لینے کیلئے ایک اعلی سطحی میٹنگ کی صدارت کی۔
لیفٹیننٹ گورنر نے یکم؍ جولائی۲۰۲۴ ء کو عملانے والے نئے فوجداری قوانین کی مؤثر عمل آوری کیلئے پولیس اہلکاروں اور دیگر متعلقہ محکموں کے ملازمین کی صلاحیت سازی اور تربیت کیلئے اُٹھائے گئے جامع اَقدامات کا جائزہ لیا۔
سنہا نے کرمنل جسٹس سسٹم کو مضبوط بنانے اور بالخصوص گھناؤنے جرائم، ملک مخالف سرگرمیوں اور دہشت گردی سے متعلق واقعات میں سزا کی شرح کو بڑھانے کے لئے مخلصانہ کوششوں پر زور دیا۔
لیفٹیننٹ گورنر نے کہا کہ ہمیں پولیس کی طرف سے کی جانے والی کاررِوائی میں شفافیت کو یقینی بنانا چاہیے اور نئے فوجداری قوانین میں نشاندہی کے مطابق تیز رفتارتفتیش اور مقدمے کی سماعت کے لئے مقرر کردہ ٹائم لائن کو پورا کرنا چاہیے۔
ایل جی نے مزید ہدایت دی کہ نئے فوجداری قوانین سے پہلے اور بعد کے دور کا تقابلی مطالعہ کیا جائے اور نئے فوجداری قوانین کے بارے میں عوام میں شعور اُجاگر کرنے کے لئے اِنفارمیشن، ایجوکیشن، سوشل ویلفیئر اور لیگل سروسز اَتھارٹی سمیت مختلف محکموں کے اِشتراک سے عوامی بیداری کیمپوں کے لئے ایک کیلنڈر تیار کیا جائے۔
میٹنگ میں مختلف تکنیکی مداخلتوں، ایس او پیز اور گائیڈ لائنز کے نوٹیفکیشن، ڈوگری اور کشمیری زبانوں میں نئے قوانین کا ترجمہ، ایف ایس ایل وین کی خریداری اور فارنسک ماہرین، جیل اہلکاروں اور عدالتی اَفسران کی تربیت کے تحت حاصل ہونے والی پیش رفت پر بھی تبادلہ خیال کیا گیا۔
میٹنگ میں چیف سیکرٹری اَتل ڈولو، ڈِی جی پی نلین پربھات، پرنسپل سیکرٹری داخلہ چندرکر بھارتی، ڈِی جی پی محکمہ جیلخانہ جات دیپک کمار، اے ڈِی جی پی ہیڈکوارٹرزو کوآرڈی نیشن ایم کے سنہا، لیفٹیننٹ گورنر کے پرنسپل سکریٹری ڈاکٹر مندیپ کے بھنڈاری، آئی جی پی ایچ کیو بھیم سین ٹوٹی اور آئی جی کرائم ڈاکٹر سنیل گپتا نے شرکت کی۔
میٹنگ میں سیکرٹری صحت و طبی تعلیم ڈاکٹر سیّد عابد رشید شاہ ،سیکرٹری قانون، انصاف وپارلیمانی امور محکمہ اچل سیٹھی،ڈائریکٹر جموں و کشمیر جوڈیشل اکیڈمی محترمہ سونیا گپتا، ایس آئی او این آئی سی جسکرن سنگھ مودی اور دیگر سینئر اَفسران نے بھی شرکت کی۔