’پرائیوٹ پریکٹس کے مرتکب ڈاکٹروں کیخلاف کارروائی ناگزیر ‘

سر نگر//
وزیر صحت سکینہ ایتو نے جمعے کے روز کہاکہ ڈیوٹی کے دوران پرائیوٹ پریکٹس کے مرتکب ڈاکٹروں کے خلاف سخت کارروائی عمل میں لائی جائے گی ۔
ایتو نے کہاکہ محکمہ صحت کو جدید خطوط پر استوار کرنے کی خاطر سرکار کوشاں ہے ۔
ان باتوں کا اظہار وزیر نے اننت ناگ میں نامہ نگاروں سے بات چیت کے دوران کیا۔
وزیر صحت نے کہاکہ محکمہ صحت میں خامیوں کو دور کرنے کی خاطر عمر عبداللہ کی قیادت میں یوٹی سرکار کام کر رہی ہے ۔
ایتو نے کہاکہ ڈیوٹی کے دوران ڈاکٹروں کی پرائیوٹ پریکٹس پر پابندی عائد ہے ۔ انہوں نے کہا جو کوئی بھی خلاف ورزی کرئے گا اس کو کسی بھی صورت میں بخشا نہیں جائے گا۔
ان کے مطابق جموں وکشمیر میں ایمرجنسی کی حالت میں کئی مریضوں کی جانیں ضائع ہوتی ہیں کیونکہ ان کے پاس ادویات کے لئے پیسے نہیں ہوتے ۔
وزیر صحت نے کہاکہ اس مسئلے کو سلجھانے کی خاطر محکمہ صحت میں فنڈ نظام قائم کیا جائے گا تاکہ اگر ایمرجنسی میں کوئی مریض ہسپتال میں آتا ہے تو اس کا فوری طورپر علا ج ومعالجہ شروع کیا جائے ۔
ایتو نے مزید بتایا کہ امکانی برف باری کے پیش نظر اننت ناگ میں محکمہ صحت کی کارکردگی کا جائزہ لیا جس دوران ڈاکٹروں کو ہدایت دی گئی کہ خراب موسمی صورتحال کے دوران وہ متحرک رہے ۔
اس سے پہلے صحت کی وزیر نے ایم ایل اے زڈی بل تنویر صادق کے ساتھ کے ہمراہ جواہر لال نہرو میموریل ہسپتال رعناواری کا اچانک دورہ کیا اور اس دوران مریضوں کی دیکھ بھال کی سہولیات اور اہم ادویات کی دستیابی کا جائزہ اور ہسپتال انتظامیہ کو ضروری ہدایات دیں۔
دورے کے دوران انہوں نے وہاں بنیادی ڈھانچے کی ضروریات کے ساتھ ساتھ طبی و نیم طبی عملے کی دستیابی کے بارے میں معلومات حاصل کیں ۔
وزیر صحت نے وہاں موجود مریضوں کیساتھ بھی بات کی ۔ مریضوں نے انہیں مختلف نوعیت کے مسائل سے آگہی دلائی، جو انہوں نے موقعے پر ہی متعلقہ حکام کیساتھ اٹھائے اور ان کا سدباب کرانے کی ہدایت کی۔
ایتو نے ہسپتال کے منتظمین کو ہدایت کی کہ اس ہسپتال پر شہر خاص کا پورا دباؤ ہونے کے ساتھ ساتھ دیگر مقامات سے بھی مریضوں کا رش ہوتا ہے اس لئے یہاں طبی و نیم طبی عملہ کی تعیناتی و دستیابی کیساتھ ساتھ ضروریات ادویات ہر وقت میسر ہونے چاہئیں۔
اس کے علاوہ شام کے وقت بھی یہاں ایمرجنسی میں سینئر ڈاکٹروں کو دستیاب رکھا جائے تا کہ مریضوں مشکلات کا سامنا نہ کرنا پڑے ۔
وزیر صحت نے ہسپتال انتظامیہ سے تیمارداروں کیلئے بھی سہولیات میسر رکھنے کی بھی تاکید کی اور کہا کہ جو لوگ مریضوں کیساتھ ہوتے ہیںاُن کا خیال رکھنا بھی ہماری ذمہ داری ہے ۔
ایتو نے ہسپتال کے واڑوں کا بھی معائینہ کیا اور اس دوران وہاں مریضوں کیساتھ بھی بات کی۔ انہوں ہسپتال میں جاری تعمیراتی کاموں کا بھی جائزہ لیا اور ہسپتال انتظامیہ سے تمام معلومات حاصل کیں۔