خشک موسم کے بیچ سرد کی شدت میں مزید اضافہ

سونہ مرگ میں منفی۷ء۹ جبکہ شوپیان میں ۵ء۸ڈگری سینٹی گریڈ ریکارڈ‘۱۲دسمبر کو ہلکی بارشوں کا امکان
سرینگر//
وادی کشمیر میں ٹھٹھرتی سردیوں کا زور تیز تر ہوا ہے اور اس دوران سرینگر میں رواں سیزن کی سرد ترین رات ریکارڈ ہوئی ہے ۔
محکمہ موسمیات کے مطابق وادی میں اگلے ایک ہفتے کے دوران خشک اور سرد موسمی حالات جاری رہ سکتے ہیں۔
اس دوران سرینگر میں رواں سیزن کی سرد ترین رات ریکارڈ ہوئی ہے جہاں کم سے کم درجہ حرارت منفی۴ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۳ء۳ڈگری سینٹی گریڈ ریکارڈ ہوا تھا۔
وسطی کشمیر میں واقع سیاحتی مقام سونہ مرگ وادی کا سرد ترین علاقہ رہا ہے جہاں کم سے کم درجہ حرارت منفی۷ء۹ڈگری سینٹی گریڈ ریکارڈ ہوا ہے ۔
جنوبی کشمیر کا ضلع شوپیاں وادی کا دوسرا ترین مقام رہا ہے جہاں کم سے کم درجہ حرارت منفی۵ء۸ڈگری سینٹی گریڈ ریکارڈ ہوا ہے جبکہ سیاحتی مقام پہلگام تیسرے درجے پر رہا ہے جہاں کم سے کم درجہ حرارت منفی۴ء۸ڈگری سینٹی گریڈ ریکارڈ ہوا ہے ۔
جنوبی کشمیر کے پلوامہ اور کولگام اضلاع میں شبانہ درجہ حرارت بالترتیب منفی۳ء۸ڈگری سینٹی گریڈ اور منفی۹ء۵ڈگری سینٹی گریڈ ریکارڈ ہوا ہے ۔
شمالی کشمیر کے بارہمولہ اور بانڈی پورہ اضلاع میں کم سے کم درجہ حرارت بالترتیب منفی۱ء۵ڈگری سینٹی گریڈ اور منفی۵ء۵ڈگری سینٹی گریڈ ریکارڈ ہوا ہے ۔
وسطی کشمیر کے بڈگام اور اننت ناگ اضلاع میں کم سے کم درجہ حرارت بالترتیب منفی۴ء۶ڈگری سینٹی گریڈ اور منفی۹ء۷ڈگری سینٹی گریڈ ریکارڈ ہوا ہے ۔
لداخ یونین ٹریٹری کے ضلع لیہہ میں کم سے کم درجہ حرارت منفی۲ء۱۳ڈگری سینٹی گریڈ جبکہ ضلع کرگل میں کم سے کم درجہ حرارت منفی۴ء۱۲ڈگری سینٹی گریڈ ریکارڈ ہوا ہے ۔
ادھر شبانہ درجہ حرارت نقطہ انجماد سے کافی نیچے درج ہونے سے جہاں آبی ذخائر منجمد ہوئے ہیں وہیں شہر و دیہات میں گھروں میں نصب پانی کے نل بھی جم گئے ہیں جس سے لوگوں کو صبح کے وقت پانی کی قلت سے دوچار ہونا پڑا۔اطلاعات کے مطابق شہرہ آفاق جھیل ڈل کے اندرونی حصے بھی جم گئے ہیں۔
محکمہ موسمیات کے مطابق وادی میں۱۸دسمبر تک موسم میں کسی بڑے پیمانے کی تبدیلی کا کوئی امکان نہیں ہے ۔انہوں نے کہا کہ وادی میں۱۱دسمبر تک موسم خشک رہنے کی توقع ہے جبکہ۱۲دسمبر کو مطلع ابر آلود رہنے کے ساتھ پہاڑی علاقوں میں کہیں کہیں ہلکی برف باری متوقع ہے ۔ان کا کہنا ہے کہ بعد ازاں وادی میں۱۳دسمبر سے۱۸دسمبر تک موسم مجموعی طور پر خشک رہ سکتا ہے ۔
محکمے کے ایک ترجمان نے کہا کہ وادی میں اگلے ایک ہفتے کے دوران خشک اور سرد موسمی حالات جاری رہ سکتے ہیں۔انہوں نے کہا کہ اہم گزرگاہوں اور اونچی جگہوں کی سڑکوں پر درجہ حرارت نقطہ انجماد سے نیچے درج ہونے اور برفانی حالات کے پیش نظر، سیاحوں/ مسافروں کو انتظامیہ کی طرف سے جاری ٹریفک ایڈوائزری پر عمل کرنے کا مشورہ دیا جاتا ہے ۔