حکومت کی ۲ +۱۰ لیکچررز کے ۵۷۵ خالی عہدوں کومشتہر کرنے کی منظوری

سرینگر//
جموں کشمیر کے بے روزگار تعلیم یافتہ نوجوانوں کو روزگار فراہم کرنے کے عمر عبداللہ کی قیادت والی حکومت کے وعدے کے مطابق ، صحت اور طبی تعلیم ، سماجی بہبود اور تعلیم کی وزیر سکینہ مسعود نے محکمہ اسکول ایجوکیشن کے۲۴ شعبوں میں براہ راست کوٹہ کے تحت۲ +۱۰ لیکچررز کی۵۷۵خالی اسامیوں پر بھرتی کے لئے اشتہار دینے کی تجویز کو منظوری دی ہے۔
کئی سالوں سے خالی ان عہدوں کو جموں کشمیر پبلک سروس کمیشن (جے کے پی ایس سی) کے پاس بھیج دیا گیا ہے تاکہ ہائر سیکنڈری اداروں کے لئے اہل تدریسی عملے کی اشد ضرورت کو پورا کیا جاسکے۔
ایتو نے کہا کہ ہماری حکومت عوام بالخصوص تعلیم یافتہ نوجوانوں سے کئے گئے وعدوں پر کاربند ہے۔ انہوں نے کہا کہ ہماری حکومت کے قیام کے پندرہ دنوں کے اندر ہم نے تعلیم یافتہ نوجوانوں کے دیرینہ مطالبات کو حل کرنے کا فیصلہ کیا ہے۔
وزیر نے مزید کہا کہ ان عہدوں کے لئے بھرتی کا عمل جلد ہی شروع ہوگا اور ریکروٹمنٹ ایجنسی کو مقررہ وقت میں اس عمل کو مکمل کرنے کا ٹاسک دیا گیا ہے۔
وزیر نے مزید کہا کہ دیگر محکموں سے بھی کہا گیا ہے کہ وہ خالی اسامیوں کی تعداد کو مستحکم کریں، جن میں گزیٹیڈ اور نان گزیٹیڈ دونوں شامل ہیں، تاکہ انہیں جلد از جلد بھرنے کے لئے ریکروٹنگ ایجنسیوں کو بھیجا جا سکے۔
ایتو نے مزید کہا کہ پرنسپلز، انچارج لیکچررز، اساتذہ، ماسٹرز اور دیگر عملے کی بروقت ترقی جیسے دیگر امور پر بھی غور کیا جارہا ہے۔ انہوں نے مزید کہا کہ ملازمین کے کیریئر کی ترقی کیلئے ڈی پی سیز کے بروقت انعقاد کی ہدایت کی گئی ہے۔