جموں وکشمیر میں صحت کے شعبے کی حالت خراب ہے

سرینگر//
صحت اور تعلیم کی وزیر‘ سکینہ ایتو نے جمعے کے روز کہاکہ جموں کشمیر میں ہیلتھ اور ایجوکیشن سیکٹر کو بہتر بنانے کی ہر ممکن کوشش کروں گی۔
ایتو نے کہاکہ غریبوں کو ہسپتالوں میں بہتر طبی سہولیات میسر ہوں اس کیلئے زمینی سطح پر اقدامات اٹھائے جائیں گے ۔
ان باتوں کا اظہار وزیر نے کولگام میں نامہ نگاروں سے بات چیت کے دوران کیا۔
صحت اور تعلیم کی وزیرنے کہاکہ جموں کشمیر میں ہیلتھ سیکٹر کی حالت کافی خراب ہے اوراس کو بہتر بنانے کی خاطر کوئی دقیقہ فروگزاشت نہیں کیا جائے گا۔
ان کے مطابق جموں کشمیر سے ہزاروں مریض باہر کی ریاستوں میں علاج ومعالجہ کرانے کی خاطر جاتے ہیں اور اس کی بنیادی وجہ یہاں پر بہتر طبی سہولیات میسر نہیں ہیں ۔
ایتو نے مزید کہاکہ جن کے پاس پیسے ہیں وہ پرائیوٹ ہسپتالوں میں اپنا علاج کراتے ہیں لیکن ہمیں سماج کے ہر طبقے کو بہتر طبی سہولیات فراہم کرنی ہے اوراس کے لئے موجودہ سرکار زمینی سطح پر کام کرے گی۔
سب ضلع ہسپتالوں کی حالت ناگفتہ بہہ ہونے کے بارے میں پوچھے گئے سوال کے جواب میں ایتو نے کہاکہ موجودہ سرکار دور افتادہ علاقوں کے لوگوں کے لئے بہتر طبی سہولیات فراہم کرنے کی کوشش کرئے گی۔
صحت اور تعلیم کی وزیر نے مزید بتایا ہیلتھ کے ساتھ ساتھ ایجوکیشن اور سوشل ویلفیئر محکموں میں بھی نئی روح پھونکی جائے گی۔
ایتو نے عمر عبداللہ کا شکریہ ادا کرتے ہوئے کہا’’مجھے بہت بڑی ذمہ داری سونپی گئی ہے جس پر کھرا اترنے کی ہر ممکن کوشش کروں گی۔‘‘