گرامین بینک فراڈ کیس:۴۰ء۳کروڑ روپے مالیت کی جائیداد کو قرق

سرینگر//
انفورسمنٹ ڈائریکٹوریٹ (ای ڈی) نے سرینگر میں جموں وکشمیر گرامین بینک فراد کیس میں ۴۰ء۳کروڑروپے مالیت کی چھ غیر منقولہ جائیدادوں کو قرق کیا۔
ای ڈی نے ایکس پر جانکاری فراہم کرتے ہوئے بتایا کہ گرامین بینک فراڈ کیس میں اشتیاق احمد پرے ساکن ٹنگہ باغ خیام سرینگر ، طارق علی پرے ، حسینہ بانو، اور مقصود علی پرے ساکنان سری نگر اور ذاکر نگر نئی دہلی میں فلیٹ کو منسلک کیا گیا ہے ۔
انفورسمنٹ ڈائریکٹوریٹ کے مطابق اس حوالے سے سی بی آئی اور اینٹی کرپشن بیورو نے چار ایف آئی آر پہلے ہی درج کئے ہیں ۔
اشتیاق احمد پرے ، اس وقت کے بینک برانچ منیجر اور دس افراد کے خلاف پہلے ہی مختلف دفعات کے تحت چارج شیٹ بھی عدالت مجاز میں داخل کئے گئے ہیں۔
ای ڈی کو تحقیقات کے دوران پتہ چلا ہے کہ اس وقت کے بینک منیجر نے سال ۱۹۔۲۰۱۴کے درمیان میر گنڈ پٹن اور خان پیٹھ برانچوں میں تعینات رہتے ہوئے دھوکہ دہی سے۱۰۷کروڑ روپے کا لون منظور کیا تھا۔
ای ڈی کے مطابق منظور کئے گئے قرضوں کو بعد ازاں نزدیکی جاننے والوں ، ڈرائیور ، یومیہ اجرت پر کام کرنے والے کارکن وغیرہ کے بینک کھاتوں میں جمع کرنے کے بعد یہ رقم بینک برانچ منیجر نے اپنے اہل خانہ کے بینک اکاونٹس میں منتقل کی اور ان پیسوں کو غیر منقولہ جائیدادوں کے حصول کیلئے استعمال کیا گیا۔