سوپور:سرگرم ملی ٹینٹ کمانڈر کے والد نے بھی ووٹ ڈالا

سرینگر//
شمالی کشمیر کے براتھ کلان سوپور میں سرگرم ملی ٹینٹ کمانڈر کے والد نے بھی ووٹ کاسٹ کیا ۔ انہوں نے اس موقع پر کہاکہ جمہوری عمل میں ہر کسی کو حصہ لینا چاہئے ۔
اطلاعات کے مطابق براٹھ کلان سوپور میں سرگرم ملی ٹینٹ کمانڈر عمر میر کے والد غلام حسن میر نے منگل کے روز اپنا ووٹ ڈالا ۔
میر نے کہا’’مجھے کسی نے مجبور نہیں کیا بلکہ میں از خود ووٹ ڈالنے کیلئے آیا ہوں اور لوگوں سے بھی کہتا ہوں کہ وہ اپنے ووٹ کو ضائع نہ کریں‘‘۔
ان کے مطابق گزشتہ تیس سالوں کے دوران جموں وکشمیر میں کافی خرابی ہوئی اب لوگ کھرے اور کھوٹے میں تمیز کرنا جانتے ہیں۔
میر نے کہا’’لوگوں کو سمجھ آچکا ہے کہ گزشتہ سالوں کے دوران انہیں رسوائی کے سوا کچھ نہیں ملا اب سبھی عزت کی زندگی جینا چاہتے ہیں‘‘۔انہوں نے مزید بتایا’’ میرا بیٹا عمر میر ۲۰۱۷کو گھر سے نکلا تب سے وہ غائب ہے ‘‘۔
میر نے اپنے بیٹے سے مخاطب ہوتے ہوئے کہاکہ زندگی ایک انمول چیز ہے ، سرینڈر کرنے سے ہی آپ کی زندگی بچ سکتی ہے ۔انہوں نے سرگرم ملی ٹینٹوں سے اپیل کی کہ وہ تشدد کا راستہ ترک کرکے قومی دھارے میں آئیں۔