دفعہ۳۷۰سے کبھی کسی عام آدمی کو فائدہ نہیں پہنچا ہے:جتندر

جموں//
مرکزی وزیر ڈاکٹر جتندر سنگھ کا کہنا ہے کہ دفعہ ۳۷۰سے کبھی کسی عام آدمی کو فائدہ نہیں پہنچا ہے ۔
انہوں نے کہا کہ اگر سری نگر یا کشمیر کی گلیوں میں عام آدمی سے پوچھا جائے گا تو وہ بھی دفعہ۳۷۰کی منسوخی کو منظور کرے گا۔
ان کا کہنا تھا کہ جموں وکشمیر میں ہر جگہ کنول ہی کنول کھلے گا۔
مرکزی وزیر نے ان باتوں کا اظہار منگل کے روز باہو اسمبلی حلقے پر اپنا ووٹ ڈالنے کے بعد نامہ نگاروں کے ساتھ بات کرنے کے دوران کیا۔
پاکستانی مہاجروں کے متعلق پوچھے جانے پر انہوں نے کہا’’یہ تمام مہاجرین جو پاکستان سے آئے تھے کانگریس پارٹی کے تئیں زیادہ موافق نہیں تھے ‘‘۔
ان کا کہنا تھا’’ان مہاجروں نے ہمیشہ کانگریس کو تقسیم ملک کیلئے ذمہ دار ٹھہرایا اور جب یہ لوگ یہاں پناہ گزیں ہوئے تو دفعہ۳۷۰؍اور دفعہ۳۵؍اے کی آڑ میں ان کو ووٹ ڈالنے کا حق تھا نہ شہریت کے حقوق تھے ‘‘۔
جتندر نے کہا’’ستم ظریفی یہ ہے کہ سماج کے اسی طبقے نے ہندوستان کو دو وزیراعظم دیے ، ڈاکٹر منموہن سنگھ اور آئی کے گجرال‘‘۔
مرکزی وزیرنے کہا کہ دفعہ۳۷۰سے کبھی کسی عام آدمی کو فائدہ نہیں پہنچا۔انہوں نے کہا’’اگر سرینگر یا کشمیر میں کسی عام آدمی سے پوچھا جائے تو وہ بھی دفعہ۳۷۰کی تنسیخ کو منظور کرے گا‘‘۔
ایک سوال کے جواب میں ان کا کہنا تھا کہ جموں وکشمیر میں ہر جگہ کنول ہی کنول کھلیں گے ۔انہوں نے کہا کہ آج جموں وکشمیر میں خوشنما ماحول اور جمہوریت کا جشن چل رہا ہے یہ ماحول برسوں کے بعد دیکھنے کو مل رہا ہے ۔
ان کا کہنا تھا کہ بھاری تعداد میں ووٹر نکل کر ووٹ ڈال رہے ہیں۔