ہمیں یقین ہے کہ آپ کو بھی یقین ہو گا… اس بات پر یقین ہو گا کہ کشمیر میں الیکشن … اسمبلی الیکشن کو لے کر جو ہوا چلی تھی … یا چل رہی ہے … اس ہو کی سمت میں بدلاؤ آگیا ہے… اور سو فیصد آگیا ہے ۔ ہم یہ نہیں جانتے ہیں کہ اس ہوا نے کس جانب رخ کیا ہے یا یہ کہ اب یہ کس سمت میں بہہ رہی ہے… چل رہی ہے‘ ہم نہیں جانتے ہیں سوائے اس ایک بات کے کہ…کہ اس میں کچھ بدلاؤ ضرور آگیا ہے… اور تب سے آگیا ہے جب سے انجینئر رشید کو جیل سے ضمانت مل گئی … جب سے انہیں کشمیر بھیج دیا گیا ۔ہم ’بھیج ‘ اس لئے کہہ رہے ہیںکہ… کہ انجینئر صاحب جس قانون(یو اے پی اے) کے تحت بند ہیں ‘ اس میں زیادہ تر ضمانت نہیں ملتی ہے… بہت مشکل سے ملتی ہے اور… اور ہم نے دیکھا بھی کہ… کہ انجینئر صاحب کو لوک سبھا ممبر کے طور حلف لینے کیلئے کتنا انتظار کرنا پڑا اور… اور جب انہیں بالآخر ضمانت ملی بھی تو… تو محض دو گھنٹوں کیلئے ملی جس دوران انہوں نے حلف لیا … اب کی بار انہیں دس بیس دن کی ضمانت ملی ہے …اور انجینئر صاحب کے کشمیر پہنچتے ہی یہ ہوا بدل سی گئی اور… اور سب کو لوک سبھاکے الیکشن یاد آگئے جس میں ان جناب نے اپنے گورے گورے بانکے چھورے عمر عبداللہ کو دھول چٹوا ئی تھی … خود جیل میں رہ کر چٹوائی تھی…اب کی بار انجینئر صاحب خود تو میدان میں نہیں ہیں‘ لیکن ان کے بہت سارے جانے انجانے لوگ میدان میں ہیں‘ اس امید کے ساتھ کہ… کہ جو انجینئر صاحب نے لوک سبھا الیکشن میں کیا تھا‘وہ اس کو اسمبلی الیکشن میں دہرا سکیں… دہرا پائیں گے یا نہیں‘کوئی کچھ نہیں جانتا ہے … لیکن اتنا سب جانتے ہیں کہ پہلے … انجینئر صاحب کی جماعت کے الیکشن میں پوری طرح سے کودنے سے پہلے لوگ یہ مان کر چلے تھے کہ… کہ نئی سرکار این سی کی ہو گی … لیکن یقین کیجئے کہ اب خود این سی کو بھی یقین نہیں ہے کہ …کہ ایسا ہو گا… اسے بھی اب شک ہے‘ گرچہ کانگریس کا ہاتھ اس کے ساتھ ہے… لیکن پھر بھی اسے یقین نہیں ہے… اور اس لئے یقین نہیں ہے کیونکہ ہوا کی سمت میں بدلاؤ سا آگیا ہے… انجینئر صاحب کی آمد سے آگیا ہے…انجینئر صاحب خود آئے ہیں یا انہیں لایا گیا ہے… ممکن ہے کہ اس بات کا جواب خود ان کے پاس بھی نہیں ہو ‘ خود انجینئر صاحب بھی نہیں جانتے ہوں کہ وہ آئے ہیں یا انہیں لایا گیا ہے… انہیں ضمانت مل گئی یا دلائی گئی … ممکن ہے کہ خود انہیں بھی یہ سب معلوم نہ ہو لیکن… لیکن ایک بات جو ہمیں معلوم ہے وہ یہ ہے کہ… کہ ہوا کا رخ میں بدل ساآرہا ہے ۔ ہے نا؟
