جموں میں فوج اور پولیس حکام کی اعلیٰ سطحی میٹنگ

جموں/
جموں کشمیر پولیس کے ڈائریکٹر جنرل (آپریشنز و سیکورٹی) نلن پربھات نے ٹائیگر ڈویژن کا دورہ کیا اور وہاں پر سیکورٹی منظر نامے اور فوج کی آپریشنل تیاریوں کا جائزہ لیا گیا۔
معلوم ہوا ہے کہ میٹنگ کے دوران جموں خطے کے سرحدی علاقوں میں سرگرم ملی ٹینٹوں کے خلاف چلائے جارہے آپریشن کے بارے میں بھی پولیس سربراہ کو بریف کیا گیا۔
اطلاعات کے مطابق جموں میں پولیس اور فوج کے سینئر آفیسران کی ایک مشترکہ میٹنگ منعقد ہوئی جس دوران سیکورٹی منظر نامے اور فوج کی تیاریوں کا جائزہ لیا گیا۔
ذرائع نے بتایا کہ میٹنگ کے دوران آنے والے اسمبلی انتخابات کو پر امن طریقے سے پایہ تکمیل تک پہنچانے کی خاطر حکمت عملی طے کی گئی جبکہ سیکورٹی گرڈ کو مزید مضبوط و مستحکم بنانے پر بھی زور دیا گیا ۔
باوثوق ذرائع کے مطابق اس اعلیٰ سطحی میٹنگ کے دوران جموں صوبے میں سیکورٹی فورسز کی تعیناتی کو مزید فعال کرنے اور سرگرم ملی ٹینٹوں کے خلاف چلائے جا رہے آپریشنز کو وسعت دینے پر بھی تبادلہ خیال ہوا۔
انتخابات کے دوران امن و قانون کی صورتحال کوبرقرار رکھنے اور پر امن انتخابات کو یقینی بنانے کی خاطر ایک مفصل خاکہ پیش کیا گیا۔
ڈی جی آپریشنز و سیکورٹی نے میٹنگ میں شریک سبھی آفیسران کو ہدایت دی کہ کسی بھی ممکنہ خطرات سے نمٹنے کے لئے چوبیس گھنٹے مستعد رہنے کی ضرورت ہے ۔
دریں اثنا جموں نشین دفاعی ترجمان کرنل سنیل نے میٹنگ کی تصدیق کرتے ہوئے بتایا کہ ڈی جی آپریشنز و سیکورٹی نے جی او سی اور فوج کے دیگر سینئر آفیسران کے ساتھ میٹنگ کے دوران سیکورٹی ایجنسیوں کے درمیان موثر تال میل کو یقینی بنانے پر زور دیا۔
ترجمان نے بتایا کہ میٹنگ کے دوران جموں وکشمیر میں نئے ابھرتے ہوئے چیلنجوں سے نمٹنے کی خاطر سیکورٹی گرڈ کو مزید مضبوط و مستحکم کرنے کا بھی فیصلہ لیا گیا۔