الیکشن کمیشن کی جموں و کشمیر اسمبلی انتخابات کے دوران ایگزٹ پول پر پابندی عائد

نئی دہلی//
الیکشن کمیشن آف انڈیا (ای سی آئی) نے جموں و کشمیر میں اسمبلی انتخابات۲۰۲۴ کے دوران عوامی نمائندگی ایکٹ ۱۹۵۱ کی دفعہ ۱۲۶؍ اے کے تحت کسی بھی طرح کے ایگزٹ پول کے انعقاد پر پابندی عائد کردی ہے۔
کمیشن کی ایک نوٹیفکیشن کے مطابق انتخابی نتائج پر ایگزٹ پول کی پابندی پولنگ کے پہلے دن پولنگ کیلئے مقرر ہ اوقات کے آغاز سے شروع ہوتی ہے اور جموں و کشمیر میں پولنگ ختم ہونے کے آدھے گھنٹے بعد تک جاری رہتی ہے۔
جموں و کشمیر اسمبلی انتخابات ۱۸ستمبر ۲۰۲۴سے مرکز کے زیر انتظام علاقے میں۳ مرحلوں میں شروع ہونے والے ہیں۔
نوٹیفکیشن میں کہا گیا ہے کہ ہریانہ اور جموں و کشمیر کی اسمبلیوں کے عام انتخابات کے شیڈول کا اعلان الیکشن کمیشن نے پریس نوٹ نمبر ون کے ذریعے کیا ہے۔
عوامی نمائندگی ایکٹ۱۹۵۱(آر پی ایکٹ، ۱۹۵۱) کی دفعہ۱۲۶؍ اے کا استعمال کرتے ہوئے نوٹیفکیشن میں اس بات پر زور دیا گیا ہے کہ’’کوئی بھی شخص پرنٹ یا الیکٹرانک میڈیا کے ذریعے کوئی ایگزٹ پول نہیں کرائے گا اور نہ ہی کسی دوسرے طریقے سے کسی ایگزٹ پول کے نتائج کی تشہیر کرے گا‘‘۔
نوٹیفکیشن میں مزید واضح کیا گیا ہے کہ ذیلی دفعہ (۱) کے مقاصد کے لیے الیکشن کمیشن ایک عام حکم کے ذریعے مندرجہ ذیل کو مدنظر رکھتے ہوئے تاریخ اور وقت کا نوٹیفکیشن جاری کرے گا۔
کمیشن نے کہا ہے کہ عام انتخابات کی صورت میں یہ مدت پولنگ کے پہلے دن پولنگ کے اوقات کے آغاز سے شروع ہوسکتی ہے اور تمام ریاستوں اور مرکز کے زیر انتظام علاقوں میں پولنگ ختم ہونے کے آدھے گھنٹے بعد تک جاری رہ سکتی ہے۔
ضمنی انتخابات یا ایک ساتھ ہونے والے متعدد ضمنی انتخابات کی صورت میں یہ مدت پولنگ کے پہلے دن پولنگ کے اوقات کے آغاز سے شروع ہوسکتی ہے اور پولنگ ختم ہونے کے آدھے گھنٹے بعد تک جاری رہ سکتی ہے۔
اگر مختلف دنوں میں متعدد ضمنی انتخابات منعقد ہوتے ہیں تو یہ مدت پہلے دن پولنگ کے اوقات کے آغاز سے شروع ہوسکتی ہے اور آخری پولنگ کے اختتام کے آدھے گھنٹے بعد تک جاری رہ سکتی ہے۔
نوٹیفکیشن میں مزید کہا گیا ہے کہ جو بھی شخص اس دفعہ کی دفعات کی خلاف ورزی کرے گا اسے دو سال تک قید یا جرمانے یا دونوں سزائیں دی جائیں گی۔
لہٰذا، آر پی ایکٹ۱۹۵۱کی دفعہ ۱۲۶؍ اے کی ذیلی دفعہ (۱) کے تحت اختیارات کا استعمال کرتے ہوئے اور اسی دفعہ کی ذیلی دفعہ (۲) کی دفعات پر غور کرتے ہوئے، الیکشن کمیشن۱۸ ستمبر۲۰۲۴ (بدھ) کو صبح۷ بجے اور ۵؍اکتوبر۲۰۲۴(ہفتہ) کو شام ساڈھے چھ بجے کے درمیان کی مدت کو مطلع کرتا ہے۔ مذکورہ عام انتخابات کے سلسلے میں پرنٹ یا الیکٹرانک میڈیا سمیت کسی بھی ذریعہ سے ایگزٹ پول کی اشاعت یا تشہیر یا کسی اور طریقے سے نشر کرنے پر پابندی ہوگی۔
مزید برآں، یہ واضح کیا جاتا ہے کہ آر پی ایکٹ۱۹۵۱کی دفعہ۱۲۶ (۱) (بی) کے تحت، مذکورہ بالا عام انتخابات کے سلسلے میں پولنگ کے اختتام کے ساتھ ختم ہونے والی۴۸ گھنٹوں کی مدت کے دوران کسی بھی انتخابی معاملے، بشمول کسی رائے عامہ کے سروے یا دیگر انتخابی سروے کے نتائج کو کسی بھی الیکٹرانک میڈیا میں دکھانا ممنوع ہے۔