بی جے پی آزاد امید واروں کو سپورٹ کر رہی ہیـ:عمرعبداللہ

سرینگر//
نیشنل کانفرنس کے نائب صدر اور سابق وزیر اعلیٰ عمرعبداللہ کا دعویٰ ہے کہ بی جے پی آزاد امید واروں کو سپورٹ کر رہی ہے تاکہ وہ ان کے ساتھ سرکار بنا سکے ۔
عمر نے کہا’’لیکن انتخابات کے نتائج بی جے پی کی سازش کو کامیاب نہیں ہونے دیں گے ‘‘۔
سابق وزیر اعلیٰ نے ان باتوں کا اظہار بدھ کے روز وسطی کشمیر کے ضلع گاندربل میں نامہ نگاروں کے ساتھ بات کرنے کے دوران کیا جہاں انہوں نے کاغذات نامزدگی جمع کئے ۔
عمر نے کہا’’یہ بات صاف ہے کہ بی جے پی کی مکمل کوشش ہے کہ زیادہ سے زیادہ آزاد امید وار کامیاب ہوں تاکہ وہ پھر ان کے ساتھ حکومت بنا سکیں لیکن ووٹر اس چیز کی اجازت نہیں دیں گے‘‘۔
سابق وزیر اعلیٰ کا کہنا تھا’’نتائج نکلیں گے تو بی جے پی کی یہ سازش ناکام ہوگی‘‘۔
این سی نائب صدر نے کہا’’گاندربل کے لوگوں نے مجھے تین بار پارلیمنٹ ممبر اور ایک بار ایم ایل اے بنایا‘‘۔
عمر عبداللہ نے کہا‘‘اشفاق جبار تب ایم ایل اے بنے جب میں نے ان کیلئے سیٹ چھوڑ دی اگر میں نے۲۰۱۴میں الیکشن لڑا ہوتا تو وہ کامیاب نہیں ہوتے لیکن انہوں نے پھر لوگوں کو دھوکہ دیا جس کی وجہ سے۲۰۱۴سے لوگوں کا کوئی کام نہیں ہوا‘‘۔
سابق وزیر اعلیٰ کا کہنا تھا’’میں الیکشن لڑ رہا ہوں تاکہ جو کام یہاں رکے پڑے ہیں ان کو دوبارہ شروع کیا جا سکے۔‘‘