کابینہ نے نجی ایف ایم ریڈیو کے 734 چینلز کی نیلامی کی منظوری دی

نئی دہلی// حکومت نے 234 شہروں میں 730 پرائیویٹ ایف ایم چینلز کی نیلامی کو منظوری دے دی ہے جس کا مقصد مختلف زبانوں بالخصوص مادری زبان میں پروگراموں کو فروغ دینا ہے ۔
وزیر اعظم نریندر مودی کی صدارت میں بدھ کو یہاں منعقدہ مرکزی کابینہ کی میٹنگ میں اس سلسلے میں ایک تجویز کو منظوری دی گئی۔
اطلاعات و نشریات کے وزیر اشونی وشنو نے میٹنگ کے بعد پریس کانفرنس میں بتایا کہ یہ منظوری نجی ایف ایم ریڈیو کی تیسرے مرحلے کی پالیسی کے تحت دی گئی ہے ۔ اس مرحلے میں زیادہ سے زیادہ ای نیلامی کرنے کی تجویز ہے جس کی تخمینہ ریزرو قیمت 784.87 کروڑ روپے ہے ۔
کابینہ نے ایف ایم چینلز کے لیے سالانہ لائسنس فیس کو گڈز اینڈ سروسز ٹیکس کو چھوڑ کر مجموعی آمدنی کے 4 فیصد پر عائد کرنے کی تجویز کو بھی منظوری دی۔ اس کا اطلاق 234 نئے شہروں اور قصبوں میں ہوگا۔
اس سے مختلف زبانوں، خاص طور پر مادری زبانوں میں مقامی پروگرام بنانے کی حوصلہ افزائی ہوگی۔ اس سے روزگار کے نئے مواقع پیدا ہوں گے ، مقامی بولی اور ثقافت کو فروغ ملے گا اور ‘مقامی لوگوں کے لیے آواز’ کے اقدامات کو فروغ دیا جائے گا۔
نجی ایف ایم چینلز کے لیے منظور کیے گئے شہروں اور قصبوں میں بہت سے خواہش مند اضلاع اور بائیں بازو کی انتہا پسندی سے متاثرہ علاقے بھی شامل ہیں۔ ان علاقوں میں پرائیویٹ ایف ایم ریڈیو کے قیام سے حکومت کی رسائی مزید مستحکم ہوگی۔