چھٹا سیمی کنڈکٹر یونٹ زیور میں قائم کیا جائے گا

نئی دہلی//مرکزی حکومت نے ایچ سی ایل اورفوکسکون کے مشترکہ منصوبے کے تحت 3706 کروڑ روپے کی سرمایہ کاری سے اتر پردیش کے زیور میں ایک اور سیمی کنڈکٹر یونٹ قائم کرنے کی تجویز کو منظوری دے دی ہے وزیر اعظم نریندر مودی کی صدارت میں بدھ کو یہاں ہوئی مرکزی کابینہ کی میٹنگ میں اس سلسلے میں ایک تجویز کو منظوری دی گئی میٹنگ کے بعد وزیر اطلاعات و نشریات اشونی کمار ویشنو نے ایک پریس کانفرنس میں بتایا کہ یہ یونٹ 2027 میں پیداوار شروع کر دے گی۔انہوں نے کہا کہ ملک میں پانچ سیمی کنڈکٹر یونٹس کی تعمیر جاری ہے۔ انہوں نے کہا کہ سال 2022 میں شروع کیے گئے انڈیا سیمی کنڈکٹر مشن کے تحت زیور میں تیار کیے جانے والے اس چھٹے یونٹ کے ساتھ، ہندوستان اسٹریٹجک لحاظ سے اہم سیمی کنڈکٹر صنعت کو ترقی دینے کے اپنے سفر میں آگے بڑھ رہا ہے۔ انہوں نے کہا کہ منظور شدہ یونٹ ایچ سی ایل اور فوکسکون کا مشترکہ منصوبہ ہے۔ یہ یمنا ایکسپریس وے انڈسٹریل ڈیولپمنٹ اتھارٹی میں زیور ہوائی اڈے کے نزدیک ایک پلانٹ قائم کریں گے۔ یہ پلانٹ موبائل فون، لیپ ٹاپ، آٹوموبائل، پی سی اور دیگر ڈسپلے ڈیوائسز کے لیے ڈسپلے ڈرائیور چپس تیار کرے گا۔ پلانٹ کو ہر ماہ 20,000 ویفر س تیار کرنے کے لیے ڈیزائن کیا گیا ہے۔ اس کی پیداواری صلاحیت ماہانہ 60 لاکھ چپس ہوگی۔ اس پلانٹ میں دو ہزار افراد کو براہ راست روزگار ملے گا۔
مسٹر ویشنو نے کہا کہ سیمی کنڈکٹر انڈسٹری پورے ملک میں شکل اختیار کر رہی ہے۔ پورے ملک کی کئی ریاستوں میں عالمی معیار کے پلانٹ قائم کیے گئے ہیں۔ ملک میں 270 تعلیمی اداروں اور 70 اسٹارٹ اپس میں طلباء اور کاروباری افراد نئی مصنوعات کی ترقی کے لیے عالمی معیار کی جدید ترین ڈیزائن ٹیکنالوجیز پر کام کر رہے ہیں۔ انہوں نے کہا کہ ہندوستان میں لیپ ٹاپ، موبائل فون، سرور، طبی آلات، پاور الیکٹرانکس، دفاعی آلات اور کنزیومر الیکٹرانکس مینوفیکچرنگ کی تیزی سے ترقی کے ساتھ سیمی کنڈکٹرز کی مانگ میں اضافہ ہو رہا ہے۔