جموں میں۳۳کلو ہیروئن برآمد‘ اسمگلر گرفتار، مزید تحقیقات جاری:جین

جموں//
جموں کشمیر کی سرمائی راجدھانی جموں میں جمعے کے روز پولیس نے منشیات کے ایک بڑے نیٹ ورک کا پردہ فاش کرکے پنجاب سے تعلق رکھنے والے اسمگلر کو دھر دبوچ کر اس کے قبضے سے ۳۳کلوہیروئن برآمد کرکے ضبط کی ہے ۔
ایڈیشنل ڈائریکٹر جنرل آف پولیس جموں آنند جین نے جمعے کے روز ایک پریس کانفرنس کے دوران بتایا کہ جموں پولیس نے مصدقہ اطلاع موصول ہونے کے بعد پنجاب سے تعلق رکھنے والے اسمگلر کی گرفتاری عمل میں لا کر اس کے قبضے سے ۳۳کلو ہیروئن برآمد کی ہے ۔
جین نے کہاکہ ابتدائی تحقیقات کے دوران منکشف ہوا ہے کہ ہیروئن کی مالیت ۳۳کروڑ روپے ہے ۔
اے ڈی جی پی نے مزید بتایا کہ گرفتار شخص نے سرحدی علاقے سے منشیات کی کھیپ حاصل کی اور پھر وہ جموں آیا۔
ان کے مطابق منشیات اسمگلر سے پوچھ تاچھ ہو رہی ہے اور مزید گرفتاریوں کو خارج از امکان قرار نہیں دی جا سکتا ہے ۔
ایک سوال کے جواب میں اے ڈی جی پی نے کہاکہ ہم ابھی یہ نہیں کہہ سکتے کہ یہ ڈرون کے ذریعے بھارتی حدود میں گرائی گئی منشیات کی کھیپ ہے ۔
جین نے کہاکہ جموں صوبے میں منشیات کا کاروبار کرنے والوں کے خلاف بڑے پیمانے پر کریک ڈاون شروع کیا گیا ہے اور ابھی تک۲۳منشیات فروشوں کے خلاف پبلک سیفٹی ایکٹ کے تحت کیس درج کیا گیا ہے ۔