بارہمولہ میں منشیات فروش کیخلاف مقدمہ درج

سرینگر//
جموں کشمیر پولیس نے منشیات سمگلروں کے خلاف سخت کارروائیاں انجام دینے کا سلسلہ جاری رکھتے ہوئے شمالی کشمیر کے ضلع بارہمولہ میں ایک بدنام زمانہ منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا۔
منشیات فروش کی شناخت نذیر احمد گگرو ولد عبدالکریم ساکن آرم پورہ بارہمولہ کے طور پر ہوئی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ منشیات فروشوں کے خلاف سخت کارروائیاں انجام دیتے ہوئے اور معاشرے سے منشیات کے بدعت کی بیخ کنی کو یقینی بنانے کے لئے پولیس نے مجاز اتھارٹی سے اجازت حاصل کرنے کے بعد ایک بدنام زمانہ منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا۔
بیان میں منشیات فروش کی شناخت نذیر احمد گگرو ولد عبدالکریم ساکن آرم پورہ بارہمولہ کے طور پر کی گئی۔انہوں نے کہا کہ ملزم منشیات فروش کو حراست میں لے کر سینٹرل جیل کوٹ بلوال جموں منتقل کیا گیا۔
ترجمان نے کہا کہ ملزم کے خلاف کئی مقدمے درج ہیں اور وہ شیری، فتح گڑھ، اولڈ ٹائون، نیو ٹائون، کانسی پورہ، دلنہ اور دیگر علاقوں میں منشیات کے کاروبار کو پھیلانے اور نوجوانوں کو منشیات سپلائی کرنے میں ملوث تھا۔انہوں نے کہا کہ کئی مقدمے درج ہونے کے باوجود وہ اپنی حرجات سے باز نہیں آیا۔
قابل ذکر ہے کہ بارہمولہ پولیس نے سال رواں کے پہلے چھ مہینوں کے دوران۴۵سخت گیر منشیات فروشوں سمیت۱۷۸منشیات فروشوں کو گرفتار کرکے ان کی تحویل سے کروڑوں روپیے مالیت کا نشہ آور مواد بر آمد کیا۔
ادھرجموں میں پولیس نے چار بد نام زمانہ منشیات فروشوں کی جائیدادیں ضبط کیں۔
پولیس کے ایک ترجمان نے بتایا کہ جموں پولیس نے بدھ کے روز چار منشیات فروش جن کی شناخت رینا عرف روپا ، شکیلہ اور پال سنگھ اس کی بیوی سیما عرف کھاری ساکنان راجیو نگر اور فرید علی ساکن لور راگورا کے بطور ہوئی کی جائیدادیں منسلک کیں ہیں۔
ترجمان نے کہاکہ جموں پولیس نے منشیات کا کاروبار کرنے والوں کے خلاف بڑے پیمانے پر کریک ڈاون شروع کیا ہے اور اسی سلسلے کی ایک کڑی کے تحت چار منشیات فروشوں کی جائیدادوں کو قرق کیا گیا۔
پولیس کا کہنا ہے کہ منشیات کا کاروبار کرنے والوں کے بارے میں عوام الناس کو قانون نافذ کرنے والے ادارے سے اپنا بھر پور تعاون فراہم کرنا چاہئے ۔