’خواتین کو تعلیم دینا سماجی واِقتصادی ترقی میں معنی خیز کردار ادا کرتا ہے‘

اونتی پورہ//
لیفٹیننٹ گورنر منوج سِنہا نے آج اِسلامک یونیورسٹی آف سائنس اینڈٹیکنالوجی (آئی یو ایس ٹی) اونتی پورہ کے تیسرے کنووکیشن سے خطاب کیا۔
لیفٹیننٹ گورنر جو یونیورسٹی کے چانسلر بھی ہیں، نے طلباکو مبارکباد دی اور صنفی مساوات کی روشن مثال قائم کرنے میں اِسلامک یونیورسٹی آف سائنس اینڈٹیکنالوجی (آئی یو ایس ٹی)کی قابل ستائش کامیابیوں کی سراہنا کی۔
ایل جی نے کہا ’’ مجھے خوشی ہے کہ آج سونے کے تمغے حاصل کرنے والے۲۷ طلباء میں سے۲۲ طالبات ہیں۔ لڑکیاں ہمارے علاقے میں سکولی اور اعلیٰ تعلیم دونوں سطحوں پر تعلیم میں بہترین کارکردگی کا مظاہرہ کر رہی ہیں۔ خواتین کو تعلیم دینا معاشرتی ترقی، اِقتصادی ترقی اوردیرپایت میں معنی خیز کردار ادا کرتا ہے۔۲۰۴۷ تک ملک کو ایک حقیقی’وِکست بھارت ‘بنانے میں اُن کا رول اہم ہے۔‘‘
ایل جی نے نوجوانوں کے خوشحال مستقبل کے لئے ایک مضبوط بنیاد بنانے میں والدین اور اَساتذہ کے کردار کو بھی سراہا۔
سنہا نے طالب علموں سے خطاب کرتے ہوئے اُنہیں مقامی چیلنجوں سے نمٹنے اور ملک کے روشن اور خوشحال مستقبل کے لئے کام کرنے کی خاطر مسلسل اِختراع کرنے کی تلقین کی۔
لیفٹیننٹ گورنرنے طالبات سے کہا’’خواہش اور عزم، دو اہم عوامل آپ کو مواقع سے فائدہ اُٹھانے اور وِکست بھارت کی تعمیر میں مستقل کردار اَدا کرنے میں رہنمائی کریں گے۔‘‘
ایل جی نے کہا کہ میرا ماننا ہے کہ تعلیم کا بنیادی مقصد طلبا میں اعلیٰ اَقدار اور آزاد انہ سوچ پیدا کرنا ہے تاکہ قوم کی تقدیر کو سنوارسکے۔ اُنہوں نے کہا کہ ہمارے تعلیمی اِداروں کو طلبأ کی حقیقی صلاحیتوں کو اُجاگر کرنے کے لئے کلاس روم کی تعلیم کو اَز سر نو ترتیب دینے پر خصوصی زور دینا چاہیے۔
لیفٹیننٹ گورنر نے صنعت اور تعلیمی اِداروں کے درمیان روابط کو مضبوط بنانے اور سٹارٹ اپ اور کاروباری آئیڈیاز کو ترقی کے لئے باہمی تعاون دینے پر زور دیا۔
سنہا نے وائس چانسلر آئی یو ایس ٹی کے ، فیکلٹی ممبران اور طلبأ کو تعلیمی ، تحقیق ، اِختراعات اور اَنٹرپرینیورشپ کے شعبوں میں نمایاں پیش رفت کرنے پر مُبارک باد دی۔اُنہوں نے کہا کہ آئی یو ایس ٹی نے نہ صرف اَپنے طلبأ کو ہنر مندی کی تربیت فراہم کرنے میں بہترین کارکردگی کا مظاہرہ کیا ہے بلکہ جموں و کشمیر میں مختلف تعلیمی اِختراعات میں بھی پیش پیش رہا ہے۔
لیفٹیننٹ گورنر نے کہا کہ قومی تعلیمی پالیسی۲۰۲۰ کے مطابق آئی یو ایس ٹی نے اَپنی تعلیمی پیشکشوں میں قابل ذِکر اضافہ کیا ہے ، کثیرشعبہ جاتی تعلیم میں شامل ہو کر انسانیت کو سائنس کے ساتھ کامیابی کے ساتھ ملایا گیا ہے اور نئے تعلیمی نظام متعارف کئے ہیں۔
سنہا نے کہا کہ ڈیزائن یور اون ڈگری موڈ میں یو جی پروگرام، چار سالہ یوجی پروگراموں کے ساتھ ملٹی پل اَنٹری ملٹی پل ایگزٹ اور دیگر اِختراعی پروگرام جیسے روبوٹِکس اینڈ آٹو میشن ، ڈیٹا سائنس ، آرٹیفشل اِنٹلی جنس ، میڈیا سٹیڈیز ، آپریشن تھیٹر ٹیکنالوجی اور بہت سے دیگر شعبوں میں یو جی پروگرام کا تعارف اورجدید تعلیمی مواقع فراہم کرنے کے عزم کا ثبوت ہے جو ہمارے طلبأ کی متنوع ضروریات کو پورا کرتے ہیں۔
لیفٹیننٹ گورنر نے کہا،’’ہم جموں و کشمیر کے تعلیمی شعبے میں بڑے پیمانے پر تبدیلی دیکھ رہے ہیں اور مجھے یقین ہے کہ آئی یو ایس ٹی جموںوکشمیر یوٹی میں علم اور اِختراع کا مینار ثابت ہوگا۔‘‘
اِس موقعہ پر اُنہوں نے خطاب کرتے ہوئے معروف نیوکلیئر سائنسدان اور اٹامک اَنرجی کمیشن کے سابق چیئرمین پدم وبھوشن ڈاکٹر انیل کاکوڈکر نے طالب علموں کو ان کے نئے سفر کا آغاز کرنے پر مُبارک باد دی۔
لیفٹیننٹ گورنر نے کہا کہ دنیا مواقع کے ساتھ ساتھ چیلنجز سے بھی بھری پڑی ہے۔ آئی یو ایس ٹی سے طلباء جو صلاحیتیں حاصل کرتے ہیں وہ اُنہیں آگے ایک کامیاب کیریئر کی قیادت کرنے اور قوم کی تعمیر میں بامعنی کردار ادا کرنے کے قابل بنائیں گی۔
وائس چانسلر آئی یو ایس ٹی پروفیسر شکیل احمد رومشو نے یونیورسٹی کی رِپورٹ پیش کی اور یونیورسٹی کی کامیابیوں کو اُجاگر کیا۔
کانووکیشن کے دوران۲۷ طلباء کو گولڈ میڈل جبکہ۵۳ طلباء کو میرٹ سر ٹیفکیٹ سے نوازا گیا۔
یو جی اور پی جی پروگراموں کیلئے کل۱۰۵۶ طلباء کو ڈگریوں سے نوازا گیا ہے اور ۱۹ طالب علموں کو پی ایچ ڈِی ڈگری کے سر ٹیفکیٹ ملے ہیں۔
اِس موقعہ پرلیفٹیننٹ گورنر کے مشیر راجیو رائے بھٹناگر،وائس چیئرمین جے اینڈ کے ہائیر ایجوکیشن کونسل پروفیسر دنیش سنگھ، مختلف یونیورسٹیوں کے وائس چانسلران،ر مختلف تعلیمی اِداروں کے سربراہاں، سول اور پولیس اِنتظامیہ کے سینئر اَفسران، فیکلٹی ممبران، طلبأ اور اُن کے والدین بھی موجود تھے۔
۔۔۔۔۔۔۔۔۔۔۔