اینٹی کرپشن بیورو نے سینئر اکاوٹنٹ کورشوت لیتے ہوئے گرفتار کیا

سرینگر//
اینٹی کرپشن بیورو (اے سی بی) نے سڈکو کھنموہ میں تعینات سینئر اکاوٹنٹ کو۱۵ہزار روپے کی رشوت لیتے ہوئے رنگے ہاتھوں گرفتار کیا ہے ۔
اے سی بی کے ایک ترجمان نے بتایا کہ ایک شخص نے اینٹی کرپشن بیورو میں تحریری طورپر شکایت درج کی کہ سڈکو کھنمو میں تعینات سینئر اکاوٹنٹ یاسین شیخ سپلیمنٹری پارٹنرشپ ڈیڈ کے حصول کی خاطر ۲۰ہزار روپے کی رشوت طلب کر رہا ہے ۔
تحریری شکایت میں مزید لکھا گیا کہ آپسی گفت وشنید کے بعد آفیسر۱۵ہزار کی رشوت لینے پر راضی ہوا۔
ترجمان کے مطابق شکایت موصول ہونے کے بعد اینٹی کرپشن بیورو نے سرکاری ملازم کے خلاف کیس درج کرکے تحقیقات شروع کی۔
ترجمان نے مزید بتایا کہ اے سی بی نے ایک جال بچھایا جس دوران سینئر اکاوٹنٹ کو سائل سے رشوت لیتے ہوئے رنگے ہاتھوں پکڑ لیا گیا۔
ان کے مطابق آزاد گواہوں کی موجودگی میں سرکاری ملازم کے قبضے سے رشوت کی رقم بھی ضبط کی گئی۔انہوں نے کہاکہ اس سلسلے میں مزید تحقیقات جاری ہے ۔