جموں و کشمیر میں اسمبلی الیکشن جلد منعقد ہوں گے :اشوک کول

سرینگر//
بی جے پی کے جنرل سکریٹری ‘اشوک کول کا کہنا ہے کہ جموں وکشمیر میں بہت جلد اسمبلی انتخابات منعقد ہوں گے ۔
کول نے کہا کہ جموں کشمیر کی تمام پارٹیوں کو مل کر جموں میں ہونے والے ملی ٹنٹ حملوں کی مذمت کرنی چاہئے ۔
بی جے پی کے جنرل سکریٹری نے ان باتوں کا اظہار منگل کے روز یہاں نامہ نگاروں کے سوالوں کے جواب دینے کے دوران کیا۔
کول نے کہا’’۹۰کی دہائی میں یہاں جو ہوا اس کا ذمہ دار کون ہے یہ سرکاروں کو سوچنا چاہئے لیکن سبھی پارٹیوں کو چاہئے خواہ وہ نیشنل کانفرنس ہے ، پی ڈی پی ہے یا کوئی دوسری پارٹی ہے ، کہ جموں میں ہونے والے ملی ٹنٹ حملوں کی مل کر مذمت کریں‘‘۔
ان کا کہنا تھا’’ان پارٹیوں کو چاہئے کہ وہ اس طرح کی سرگرمیوں میں ملوث طاقتوں کو سخت وارننگ دیں‘‘۔انہوں نے کہا کہ جموں و کشمیر میں گذشتہ پانچ برسوں سے امن کا ماحول بنا ہوا ہے جس کو بگاڑنے کی کوشش کی جا رہی ہے ۔
بی جے پی کے جنرل سکریٹری نے کہا’’میری تمام پارٹیوں سے گذارش ہے کہ وہ اس چکر میں نہ پڑیں کہ اس کا ذمہ دار کون ہے بلکہ جو ذمہ دار ہے اس کو سیدھا نشانہ بنا کر کٹہرے میں کھڑا کیا جائے ‘‘۔
اسمبلی انتخابات کے انعقاد کے بارے میں پوچھے جانے پر ان کا کہناتھا’’حالات جلد ٹھیک ہوں گے تو یہاں اسمبلی انتخابات بھی منعقد ہوں گے ‘‘۔
کول نے کہا کہ ہم میٹنگوں کے دوران اپنے کارکنوں کو چنائو کے لئے تیار کرتے ہیں۔