بارہمولہ میں پاکستان میں مقیم۵جنگجو ہینڈلروں کی جائیدادیںضبط

سرینگر//
جموں کشمیر پولیس نے شمالی کشمیر کے ضلع بارہمولہ میں پاکستان میں مقیم۵جنگجو ہینڈلروں کی کروڑوں روپیے مالیت کی غیر منقولہ جائیدادوں کو منسلک کر دیا ہے ۔
ایک پولیس ترجمان نے بتایا کہ عدالت کی طرف سے اجازت حاصل کرنے کے بعد پولیس نے بارہمولہ میں پاکستان میں مقیم ۵دہشت گرد ہینڈلروں کی۹ کنال اراضی سمیت کروڑوں روپیے مالیت کی جائیدادوں کو قرق کر دیا۔
بیان میں جنگجو ہینڈلروں کی شناخت بشیر احمد گنائی ولد غلام احمد گنائی ساکن تلہ گام، معراج الدین لون ولد فتح محمد ساکن کھر گام، غلام محمد یتو ولد غلام احمد ساکن تلہ گام، عبدالرحمان بٹ ولد محمد سبحان ساکن وانی گام پائین اور عبدالرشید لون ولد غلام محی الدین لون ساکن ستری سیرن کے طور پر کی گئی ہے ۔
بیان میںانہوں نے کہا کہ یہ کارروائی پولیس اسٹیشن کریری میں یو اے پی اے کے متعلقہ دفعات کے تحت درج ایک ایف آئی آر زیر نمبر۲۰۰۸/۴میں انجام دی گئی۔
ترجمان نے کہا کہ جموں وکشمیر پولیس کی طرف سے کی جانے والی تحقیقات کے دوران یہ جائیدادیں منسلک کر دی گئیں۔انہوں نے کہا کہ اس معاملے میں مزید تحقیقات جاری ہے ۔