جموں کشمیر پر اتوار کو اجلاس طلب۔۔۔۔وزیر داخلہ نے یو ٹی سکیورٹی صورتحال کے اعلیٰ سطحی اجلاس میں جائزہ لیا

نئی دہلی//
جموں کشمیر میں بڑھتی ہوئی دہشت گردانہ سرگرمیوں کے پیش نظر وزیر اعظم نریندر مودی کے بعد مرکزی وزیر داخلہ امت شاہ نے بھی جمعہ کو یہاں سینئر عہدیداروں کے ساتھ ایک میٹنگ میں مرکز کے زیر انتظام علاقے میں سیکورٹی صورتحال کا جائزہ لیا۔
شاہ نے جموں و کشمیر میں سیکورٹی صورتحال کا تفصیلی جائزہ لینے اور امرناتھ یاترا کی تیاریوں کا جائزہ لینے کے لئے اتوار کو یہاں نارتھ بلاک میں ایک میٹنگ بلانے کی بھی ہدایت دی۔
اس میٹنگ میں جموں و کشمیر کے لیفٹیننٹ گورنر منوج سنہا، قومی سلامتی کے مشیر اجیت ڈوبھال، مرکزی داخلہ سکریٹری اجے بھلا اور فوج، پولیس، جموں و کشمیر انتظامیہ اور مرکزی وزارت داخلہ کے سینئر افسران شرکت کریں گے۔
ذرائع نے بتایا کہ وزیر داخلہ کو جموں و کشمیر کی موجودہ صورتحال اور دہشت گردی کے واقعات کے بعد اٹھائے گئے اقدامات کے بارے میں جانکاری دی گئی۔
قبل ازیں جمعرات کو مودی نے شاہ اور ڈوبھال اور دیگر سینئر عہدیداروں کے ساتھ جموں و کشمیر کی صورتحال کا جائزہ لیا تھا۔
مودی نے فوج کوانسداد دہشت گردی کی کارروائیوں میں اپنی تمام تر صلاحیتوں کو برائے کار لانے کی ہدایت دی ۔
سنہا نے وزیر اعظم کو مرکز کے زیر انتظام علاقے کی صورتحال سے بھی آگاہ کیا تھا۔ اس کے بعد مودی نے دہشت گردی کے خلاف کارروائی میں مسلح افواج کی پوری صلاحیت کا استعمال کرنے کے لئے کہا تھا۔
قابل ذکر ہے کہ جموں و کشمیر میں گزشتہ ایک ہفتے سے دہشت گردانہ سرگرمیوں میں اضافہ ہوا ہے اور سیکورٹی اہلکاروں اور دہشت گردوں کے درمیان مسلسل انکاؤنٹر ہو رہے ہیں۔
ریاسی، کٹھوعہ اور ڈوڈا اضلاع میں گزشتہ چار دنوں کے دوران دہشت گردوں نے چار مقامات پر حملہ کیا، جس میں نو یاتری اور سی آر پی ایف کا ایک جوان ہلاک اور سات سیکورٹی اہلکار اور متعدد زخمی ہوگئے۔
ضلع کٹھوعہ میں سیکورٹی فورسز کے ساتھ تصادم میں دو مشتبہ پاکستانی دہشت گرد بھی مارے گئے اور ان کے پاس سے بھاری مقدار میں اسلحہ اور گولہ بارود برآمد کیا گیا۔