’ بی جے پی پاکستانی ایٹم بم سے نہیں ڈرتی ہے‘۔۔۔وزیر اعظم مودی نے نہ صرف کشمیر میں ترنگا لہرایا بلکہ ملک سے دہشت گردی کو ختم کردیا :شاہ

بالیا/۲۹مئی
وزیر داخلہ ‘امیت شاہ نے کانگریس کو تنقید کا نشانہ بناتے ہوئے کہا ہے کہ بھارتیہ جنتا پارٹی (بی جے پی) پاکستان کے ایٹم بم سے خوفزدہ نہیں ہے ۔
اتر پردیش کے بالیا میں ایک انتخابی ریلی سے خطاب میں شاہ نے کہا ’’کانگریس پارٹی ہمیں ڈرانے کی کوشش کرتی ہے، وہ کہتی ہے کہ پاکستان کے پاس ایٹم بم ہے، پاکستان کے زیر قبضہ کشمیر (پی او کے) کے بارے میں بات نہ کریں‘‘۔
شاہ نے کہا’’میں آپ کو بتانے آیا ہوں، راہل بابا، ہم بی جے پی سے ہیں، ہم ایٹم بم سے نہیں ڈرتے، پی او کے ہندوستان کا ہے، ہندوستان کا ہے اور ہم اسے لیں گے‘‘۔
وزیر داخلہ نے کہا کہ وزیر اعظم مودی نے کشمیر میں نہ صرف ترنگا لہرایا بلکہ انہوں نے اس ملک سے دہشت گردی کو ختم کرنے کے لئے بھی کام کیا۔
شاہ نے مزید کہا کہ اگر جنگ چھڑ جاتی ہے تو اتر پردیش میں تیار کردہ توپوں کے گولے پاکستان کو گرانے میں کارآمد ثابت ہوں گے۔
سماج وادی پارٹی پر تنقید کرتے ہوئے امیت شاہ نے کہا’’ایس پی کے دور حکومت میں بجلی کا مسئلہ تھا۔ رمضان کے دوران بجلی پوری طرح سے موجود ہوتی تھی، لیکن جنم اشٹمی کے دوران نہیں۔ بی جے پی کے اقتدار میں آنے کے بعد سی ایم یوگی ریاست میں بجلی لے کر آئے‘‘۔
وزیر داخلہ نے کانگریس کو بھی تنقید کا نشانہ بنایا اور کہا کہ ’پچھڑا‘ مخالف پارٹی کانگریس نے بغیر کسی آئینی اہتمام کے مسلمانوں کو پسماندہ طبقات کا ریزرویشن دینے کا کام کیا ہے۔ انہوں نے کرناٹک اور حیدرآباد میں مسلمانوں کو ۴؍ اور۵ فیصد ریزرویشن دیا۔ انہوں نے مذہب کی بنیاد پر ریزرویشن دیا، جو قانون کے خلاف ہے۔
بی جے پی کے وعدے کو دہراتے ہوئے امیت شاہ نے کہا’’جب تک بی جے پی کے پاس ایک بھی رکن پارلیمنٹ ہے، ہم پسماندہ طبقات کے لئے ریزرویشن کو چھونے نہیں دیں گے۔‘‘
وفاقی وزیر داخلہ نے ۱۹۹۰ میں کارسیوکوں پر فائرنگ کا حوالہ دیتے ہوئے کہا کہ یہ الیکشن رام مندر کی تعمیر کرنے والے اور رام بھکتوں پر گولی چلانے والوں کے درمیان ہے۔
شاہ نے کہا’’ووٹوں کی گنتی ۴ جون کو ہوگی۔ دوپہر میں دونوں شہزادے (راہل گاندھی اور اکھلیش یادو) پریس کانفرنس کریں گے اور کہیں گے کہ ہم الیکشن ہار گئے کیونکہ ای وی ایم خراب تھی‘‘۔
وزیر داخلہ نے کہا کہ مودی نے پانچ مرحلے میں ۳۱۰ سیٹوں کو عبور کیا ہے۔’’ راہول بابا آپ کو ۴۰ سیٹیں بھی نہیں ملیں گی اور دوسرے شہزادے (اکھلیش یادو) کو صرف چار سیٹیں ملیں گی۔‘‘