سرینگر//(ویب ڈیسک)
لوک سبھا انتخابات کے پانچویں مرحلے کی پولنگ میں بھی کم ٹرن آؤٹ رہا۔
میڈیا رپورٹس کے مطابق شام پانچ بجے تک مجموعی طور پر۴۷ء۵۷ فی صد پولنگ ہوئی۔ مغربی بنگال میں سب سے زیادہ۷۳ فی صد پولنگ ریکارڈ کی گئی۔
پانچویں مرحلے کی پولنگ کے دوران مغربی بنگال کے برک پور، بونگاؤں، آرام باغ اور ہوڑہ حلقوں سمیت کئی مقامات پر پرتشدد واقعات ہوئے ہیں۔
الیکشن کمیشن کے مطابق صبح ۷بجے سے شام۶ بجے تک ہونے والی ووٹنگ مجموعی طور پر پرامن رہی۔ اڈیشہ اسمبلی انتخابات کے دوسرے مرحلے کے پانچویں مرحلے میں بھی۳۵سیٹوں پر ووٹنگ ہوئی، جس میں ان سیٹوں کے ۷۰ء۶۰فیصد ووٹروں نے حصہ لیا۔
شام ساڈھے سات بجے کمیشن کی طرف سے جاری کردہ اعداد و شمار کے مطابق، پانچویں مرحلے میں مغربی بنگال کی سات سیٹوں پر سب سے زیادہ ووٹنگ فیصد۷۳فیصد رہی، جب کہ سب سے کم ووٹنگ مہاراشٹر میں ہوئی، جہاں ووٹنگ کا فیصد ۰۱ء۴۹رہا۔کمیشن ذرائع کے مطابق ووٹنگ مجموعی طور پر پرامن رہی۔
اس مرحلے میں بہار کی کل۴۰سیٹوں میں سے پانچ کے لیے۶۰ء۵۲فیصد ووٹ ڈالے گئے ۔ جھارکھنڈ میں ۱۴میں سے تین سیٹوں پر۰ء۶۳فیصد ووٹنگ ہوئی۔ مہاراشٹر کی کل۴۸سیٹوں میں سے ۱۳سیٹوں پر۰۱ء۴۹فیصد ووٹروں نے اپنے حق رائے دہی کا استعمال کیا۔ اڈیشہ میں آج لوک سبھا کی۲۱میں سے پانچ سیٹوں پر ووٹنگ ہوئی، جہاں ۷۲ء۶۰فیصد ووٹروں نے اپنا ووٹ ڈالا۔
اتر پردیش کی ۸۰میں سے۱۴سیٹوں پر جن کے لیے آج ووٹنگ ہوئی، ووٹنگ کا فیصد ۷۹ء۵۷رہا۔ جموں و کشمیر کی پانچ سیٹوں میں سے بارہمولہ سیٹ پر آج ووٹنگ ہوئی، جہاں مرکزکے زیر انتظام علاقے کے چیف الیکٹورل آفیسر کے مطابق۵۹فیصد ووٹ ڈالے گئے ‘جو۱۹۸۴کے بعد سب سے زیادہ ہے ۔ لداخ کی واحد سیٹ پر۰۱ء۶۷فیصد ریکارڈ کیا گیا۔
اس طرح ان۴۹نشستوں پر۶۹۵امیدواروں کی قسمت الیکٹرانک ووٹنگ مشین میں درج ہو چکی ہے ۔
ممبئی میں متعدد بالی وڈ ستاروں نے ووٹ ڈالے جن میں شاہ رخ خان، گوری خان، سہانہ خان، اکشے کمار، فرحان اختر، گووندا، رنویر سنگھ اور دیپکا پاڈوکون کے علاوہ ریلائنس گروپ کے چیئرمین انل امبانی قابلِ ذکر ہیں۔ شاہ رخ حان نے ہفتے کو اپنے مداحوں سے ووٹ دینے کی اپیل کی تھی۔
پولنگ کے دوران وزیرِ اعظم نریندر مودی نے اڑیسہ کے شہر پْری میں واقع جگن ناتھ مندر میں پوجا کی۔ جب کہ راہل گاندھی نے رائے بریلی کے ہنومان مندر میں پوجا کی۔
وزیرِ اعظم نریندر مودی نے اپنے ایک پیغام میں عوام سے بڑھ چڑھ کر ووٹ دینے کی اپیل کی۔
مودی نے کم ٹرن آؤٹ کا ذکر کیا اور کہا کہ کانگریس اور اپوزیشن کے اتحاد ’انڈیا‘ کی دیگر پارٹیوں کے کارکن بھی ووٹ دینے کے لیے گھروں سے نہیں نکل رہے ہیں۔ ان کے بقول اپوزیشن کی جانب سے کمزور انتخابی مہم کی وجہ سے کم ٹرن آؤٹ دیکھنے کو مل رہا ہے۔
اپوزیشن رہنماؤں کا کہنا ہے کہ کم ٹرن آؤٹ کی وجہ بی جے پی کے کارکنوں میں جوش خروش کا کم ہونا ہے۔ وہ بڑھ چڑھ کر ووٹ دینے کے لیے نہیں نکل رہے ہیں۔
راہل گاندھی نے پولنگ کے روز اپنے حلقے رائے بریلی کے بعض علاقوں کا دورہ کیا۔ انھوں نے الزام عائد کیا کہ کچھ پولنگ بوتھوں پر ووٹرز کو ووٹ دینے سے روکا جا رہا ہے۔ ان کے بقول پورے ملک میں تبدیلی کی آندھی چل رہی ہے۔
رپورٹس کے مطابق ایودھیا میں بی جے پی کو امید ہے کہ وہاں سے اس کے سٹنگ ایم پی تیسری بار ریکارڈ ووٹوں سے کامیاب ہوں گے۔
اخبار ’ٹائمز آف انڈیا‘کی ایک رپورٹ کے مطابق ایودھیا کے ایک پرانے ہوٹل ’شانِ اودھ‘ کے ڈائریکٹر شرد کپور کے مطابق رام مندر کی تعمیر سے مقامی بزنس میں اضافہ ہوا۔ لیکن کچھ ایشوز بھی پیدا ہوئے ہیں جن کو منتخب نمائندوں کو دیکھنا چاہیے۔
ان کے مطابق ووٹرز کے ایک بڑے طبقے میں عدم تحفظ کا احساس پیدا ہوا ہے جس کی وجہ سے دیہی علاقوں کے بیشتر ووٹرز ووٹ دینے کے لیے نہیں نکلے۔
