فرائض میں کوتاہی:سانبا میںتین ایس پی اوز کو برطرف کردیا گیا

جموں//
جموں کشمیر کے سانبا ضلع میں تین اسپیشل پولیس افسروں (ایس پی اوز) کو ڈیوٹی میں کوتاہی برتنے اور نارکوٹکس ڈرگس اینڈ سائکوٹروپک سبسٹینس (این ڈی پی ایس) ایکٹ میں ملوث ہونے کے الزام میں منگل کو نوکری سے برطرف کر دیا گیا۔
پولیس نے بتایا کہ ایس پی او‘دلجیت سنگھ، بالی رام اور دیپک سنگھ کو۲۰۲۳ میں ان کے اور دیگر عہدیداروں کے خلاف شروع کی گئی دو الگ الگ محکمانہ جانچ کو نمٹاتے ہوئے ملازمت سے ہٹا دیا گیا ہے۔
عہدیداروں نے بتایا کہ دلجیت سنگھ اور بالی رام کو رام گڑھ پولیس اسٹیشن میں درج قتل کے معاملے میں گرفتار کیا گیا تھا لیکن وہ پولیس حراست سے فرار ہوگئے تھے۔انہوں نے بتایا کہ فرائض میں کوتاہی کی وجہ سے انہیں ملازمت سے ہٹا دیا گیا تھا۔
عہدیداروں نے بتایا کہ دیپک سنگھ کو سانبا پولیس اسٹیشن میں این ڈی پی ایس ایکٹ کی متعلقہ دفعات کے تحت درج ایک معاملے میں ملوث ہونے پر ملازمت سے ہٹا دیا گیا ہے۔