رام بن ضلع کے سناسر میں کھلا ٹیولپ باغ سیاحوں کی دلچسپی کا مرکزبن رہا ہے

جموں//
جموںکشمیر کے ضلع رام بن میں سر سبز و شاداب چراگاہوں کے درمیان واقع دلکش و دلپذیرسناسر باغ میں کھلے قریب ڈھائی لاکھ ٹیولپ سیاحوں کی دلچسپی کا مرکز بن رہے ہیں۔
متعلقہ حکام کا کہنا ہے کہ سناسر کے ٹیولپ باغ کو لوگوں کے لئے کھول دیا گیا ہے اور ۴۰کنال اراضی پر قریب۵ء۲لاکھ ٹلپ کھل گئے ہیں۔
ایک عہدیدار نے بتایا’’سناسر ٹیولپ گارڈن میں انتہائی خوبصورت اور دلکش نظارہ ہے اور امسال اس باغ میں۲۵قسموں کے ٹیولپ لگائے گئے ہیں‘‘۔انہوں نے کہا کہ سال بھر سیاحوں کو راغب کرنے کے لئے اس مقام پر ایک ’گلاب کا باغ‘لگانے کو بھی تجویز کیا گیا ہے ۔
ان کا کہنا تھا کہ سنسار آنے والے سیاح اب ٹیولپ گاڑدن کی سیر سے بھی لطف اندوز ہوں گے ۔انہوں نے زیادہ سے زیادہ سیاحوں کو سنسار میں ٹیولپ گارن کی سیر کرنے کی دعوت دی۔
عہدیدار نے بتایا کہ جموں و کشمیر منفرد حسن و جمال سے مالا مال ہے اور یہاں سیاحت کی کافی گنجائش موجود ہے ۔انہوں نے کہا کہ سال گذشتہ انتظامیہ نے جموں میں ۴۰کنال اراضی پر ٹلپ گارڈن لگانے کے پروجیکٹ کو منظوری دی تھی۔انہوں نے کہا کہ سنسار میں پٹنی ٹاپ ڈیولپمنٹ اتھارٹی کی طرف سے گالف کورس کو دو بارہ بحال کیا جائے گا اس سیاحتی مقام کی ہمہ گیر ترقی کے لئے اضافی اقدام کئے جائیں گے ۔
قابل ذکر ہے کہ جموں و کشمیر انتظامیہ ’سیاحتی مشن‘پہل کے طور پر لوگوں کی امنگوں کو پورا کرنے کے لئے نئی اقتصادی راہیں کھولنے کے لئے ۷۵نئے مقامات‘۷۵صوفی/ مذہبی مقامات‘۷۵نئے ثقافتی مقامات اور۷۵ورثے کے مقامات کو سامنے لا رہی ہے ۔