سرسوں کے لہلہاتے کھیت مقامی و غیر مقامی سیاحوں کی دلچسپی کا مرکز

سرینگر//
موسم بہار سایہ فگن ہونے کے ساتھ ہی جہاں وادی کشمیر کے مشہور سیاحتی مقامات پر سیاحوں کی آمد کا سلسلہ زور پکڑتا ہے تو وہیں دوسری طرف یہاں زرد اور سبز پھولوں سے لہلہاتے سرسوں کے کھیت کھلیان بھی خاص طور پر غیر مقامی سیاحوں کی دلچسپی کا مرکز بن رہے ہیں ۔
کھیتوں میں کھلے سرسوں کے چمچماتے پھولوں کے دلکش و دلفریب نظارے سیاحوں کو گاڑیوں سے اتر کر ان کھیتوں میں تصویریں کھینچنے اور ان نظاروں میں کچھ وقت صرف کرنے پر مجبور کرتے ہیں۔
بتادیں کہ وادی کشمیر میں اس وقت کھیتوں میں سرسوں کے پھول کھلے ہیں جس سے وادی کی قدرتی خوبصورتی و رعنائی دو بالا ہوئی ہے ۔
شمالی کشمیر میں واقع سیاحتی مقام گلمرگ جانے والے والے غیر مقامی سیاح جب راستے میں سرسوں کے کھیتوں کا نظارہ دیکھتے ہیں تو وہ گاڑیوں سے اتر کر ان نظاروں سے لطف اندوز ہوتے ہیں اور کھیتوں میں جا کر فوٹو گرافی بھی کرتے ہیں۔
ٹنگمرگ سے تعلق رکھنے والے جہانگیر بشیر نامی ایک شہری نے یو این آئی کو بتایا کہ سرسوں کے کھیتوں سے گذرنے کے دوران غیر مقامی سیاح خاص طور پر رک جاتے ہیں اور ان کھیتوں کی خوبصورتی سے بھی لطف اندوز ہوئے بغیر آگے نہیں بڑھتے ہیں۔
بشیر نے کہا’’سرسوں کے کھیت بھی اب یہاں سیاحتی مقامات کی طرح سیاحوں کی دلچسپی کا باعث بن رہے ہیں جو ایک اچھی بات ہے کیونکہ اس سے سیاحتی شعبے کو مزید فروغ ملے گا‘‘۔
محمد امین نامی ایک شہری نے بتایا کہ سرسوں کے کھیتوں کی خوبصورتی تو مقامی لوگوں کو مسحور کرتی ہے غیر مقامی سیاحوں کی تو بات ہی نہیں ہے ۔انہوں نے کہا’’نہ صرف غیر مقامی سیاح بلکہ مقامی لوگ بھی ان کھیتوں میں جا کر خوبصورت پھولوں کے بیچ فوٹو گرافی کرتے ہیں‘‘۔
غیر مقامی سیاحوں کا بھی ماننا ہے کہ موسم بہار میں کشمیر کی سیر کیلئے ضرور آنا چاہئے تاکہ سرسوں کے پھولوں کے نظاروں سے بھی لطف اندوز ہونے کا موقع مل سکے ۔
اتر پردیش سے تعلق رکھنے والی ایک خاتون سیاح نے کہا کہ سرسوں کے کھیتوں کی خوبصورتی دیکھ میں وہ دنگ رہ گئی۔ انہوں نے کہا ’’میں نے ایسا خوبصورت نظارہ اب تک نہیں دیکھا تھا جی کرتا ہے کہ ان ہی کھیتوں میں دن رات بیٹھ جاؤں‘‘۔
دریں اثنا حکام کے مطابق وادی میں گذشتہ دو برسوں کے دوران سرسوں کی کاشت کے لئے استعمال کی جانے والی اراضی وسیع تر ہو رہی ہے ۔
متعلقہ محکمے کی کاوشوں کے نتیجے میں وادی میں اس اراضی پر بھی سرسوں کی فصل اگائی جا رہی ہے جو پہلے خالی پڑی رہتی تھی۔کسانوں کے مطابق امسال سرسوں کی کافی اچھی فصل ہے جس سے ان کو کافی فائدہ ہونے کی توقع ہے ۔
وسطی کشمیر کے ضلع بڈگام کے مقبول احمد نامی ایک کسان نے بتایا’’میں نے بیس کنال اراضی پر سرسوں کی فصل لگائی ہے اور فصل بہت اچھی ہے ‘‘۔انہوں نے کہا کہ ہر کسان کو یہ فصل اگانی چاہئے کیونکہ اس میں خرچہ اور محنت کم لگتی ہے جبکہ منافع اچھا خاصا ہوتا ہے ۔