ایل جی سنہا کا دہلی میںکالج آف کامرس کے بزنس کنکلیو سے خطاب

نئی دہلی//
لیفٹیننٹ گورنر‘ منوج سنہا نے آج نئی دہلی میں شری رام کالج آف کامرس کے زیر اہتمام بزنس کنکلیو ۲۰۲۴سے خطاب کیا۔
اپنے کلیدی خطاب میں لیفٹیننٹ گورنر نے دفعہ ۳۷۰کی منسوخی کے بعد جموں و کشمیر مرکز کے زیر انتظام جموں و کشمیر کی کامیابیوں اور اس کے مستقبل کے وڑن کے بارے میں بتایا۔
سنہا کاکہنا تھا’’آج جموں کشمیر متاثر کن رفتار سے ترقی کر رہا ہے اور مختلف شعبوں میں خاموشی سے تبدیلی آ رہی ہے۔ ہم نے عوام کی امنگوں کو پورا کرنے کیلئے جامع اور تیز رفتار ترقی کے اہداف کو حاصل کرنے کیلئے کلیدی اقتصادی شعبوں میں تبدیلی کا آغاز کیا ہے‘‘۔
ایس آر سی سی کے طلباء سے بات چیت کرتے ہوئے لیفٹیننٹ گورنر نے وزیر اعظم نریندر مودی کی قیادت میں مختلف شعبوں میں چیلنجوں اور کامیابیوں پر روشنی ڈالی۔
لیفٹیننٹ گورنر نے کہا کہ آج جموں کشمیر جدت طرازی، صنعتوں، سیاحت، تعلیم، کھیلوں، زراعت، صحت، انٹرپرینیورشپ اور دستکاری کا مرکز بن چکا ہے۔انہوں نے کہا کہ جامع ترقی کے لئے انتظامیہ کے عزم نے محروم طبقوں ، نوجوانوں ، خواتین اور کسانوں کے لئے اپنی حقیقی صلاحیتوں کو بروئے کار لانے کے لئے سازگار ماحول پیدا کیا ہے۔
ایل جی نے مزید کہا کہ ہم نے خوف سے پاک، بدعنوانی سے پاک اور دہشت گردی سے پاک جموں و کشمیر بنانے کے لئے ٹھوس اقدامات اٹھائے ہیں۔’’ عوام پر مرکوز حکمرانی، موثر عوامی خدمات کی فراہمی کا طریقہ کار، پروجیکٹوں کی تکمیل کی تیز رفتار، فلاحی اسکیموں کی تکمیل اور سب کے لئے مساوی مواقع نے عام آدمی کو بااختیار بنایا ہے اور زندگی کو آسان بنایا ہے‘‘۔
لیفٹیننٹ گورنر نے کہا کہ ان کیلئے پالیسی صرف کاغذ کا ٹکڑا نہیں ہے بلکہ عوام کے خواب اور امنگیں ہیں۔
سنہا کاکہنا تھا’’ہم نے عام آدمی کو پالیسی سازی میں حصہ دار بنایا ہے اور ان کی ضروریات کے مطابق ترقیاتی کام کیے جارہے ہیں۔ جموں و کشمیر ڈیجیٹل کنیکٹیوٹی اور فزیکل کنکٹیویٹی میں ملک میں متاثر کن پیش رفت کر رہا ہے۔ اسمارٹ سٹی پروجیکٹوں نے شہری تبدیلی کے خواب کو پورا کیا ہے اور نوجوانوں کی امنگیں اور خواب پھل پھول رہے ہیں‘‘۔
لیفٹیننٹ گورنر نے اس معزز ادارے کی انتظامیہ، فیکلٹی اور طلباء کو بھی مبارکباد دی۔شری رام کالج آف کامرس کی پرنسپل پروفیسر سمرت کور۔ اس موقع پر کالج کے ممتاز شہری، فیکلٹی ممبران اور طلباء موجود تھے۔