بیشتر مسلم ممالک میں رمضان المبارک ۱۲ مارچ سے شروع ہو نے کا امکان

سرینگر//
مسلمانوں کو ہر سال رمضان المبارک کے مقدس ماہ کا بے صبری سے انتظار ہوتا ہے، ایسے میں کئی کئی ماہ قبل ہی ماہرین کی جانب سے پیشگوئیاں کردی جاتی ہیں کہ کون سے ملک میں رمضان کا چاند کب نظر آئے گا۔
گلف نیوز کی رپورٹ کے مطابق۱۱فروری۲۰۲۴ کو شعبان کا مہینہ شروع کرنے کے بعد کئی اسلامی ممالک۱۰ مارچ کو رمضان المبارک کا چاند دیکھنے کی تیاری کریں گے۔
ماہرین فلکیات کا اس حوالے سے بتانا ہے کہ اس دن یعنی ۱۰مارچ کو مرکزی کنکشن صبح۹ بجے ہوگا، اس حساب سے ۱۰مارچ کو زیادہ تر اسلامی ممالک میں سورج کے غروب ہونے کے بعد ہی چاند دکھائی دینے کی امید ہے۔
کئی ماہرین فلکیات کا خیال ہے کہ۱۰مارچ کو پورے عرب اور اسلامی دنیا میں چاند نظر آنے کے امکانات بہت کم ہیں۔
فلکیات کے ماہرین کے مطابق اسلامی ممالک میں رمضان المبارک کا آغاز۱۲ مارچ بروز منگل سے متوقع ہے۔
اس دوران سعودی عرب کی وزارت برائے امور اسلامی و رابطہ نے رمضان المبارک کے دوران مساجد میں افطار کرنے پر پابندی عائد کر دی۔سعودی وزارت برائے امور اسلامی و رابطہ کے مطابق اس فیصلے کا مقصد مساجد میں صفائی ستھرائی کو یقینی بنانا ہے۔
سعودی وزارت برائے امور اسلامی نے مساجد کے لیے خصوصی ہدایات جاری کرتے ہوئے آئمہ مساجد پر پابندی عائد کردی ہے کہ وہ رمضان المبارک میں لوگوں کو افطار کروانے کے لیے کسی قسم کے عطیات قبول نہیں کریں گے۔
جاری کردہ ہدایات کے مطابق رمضان المبارک میں مساجد کے باہر مختص کردہ مقامات پر افطار کروائی جاسکے گی۔
علاوہ ازیں نمازوں اور دیگر سرگرمیوں کو ریکارڈ کرنے یا نشر کرنے کیلئے کیمروں کے استعمال پر بھی پابندی ہوگی۔
سعودی وزارت برائے امور اسلامی نے آئمہ مساجد کو ترغیب دی ہے کہ وہ رمضان کے دوران نماز تراویح کو طویل کرنے سے گریز کریں اور عوام کو روزوں اور ان کے فوائد کے بارے میں عملی معلومات فراہم کریں۔
دریں اثنا حرمین شریفین انتظامیہ میں دینی امور کے سربراہ شیخ ڈاکٹر عبد الرحمن السدیس کی نگرانی میں رمضان المبارک منصوبے کا اعلان ہوگا۔
اس مقصد کیلئے خصوصی تقریب کل اتوار کو ایک بجکر ۴۵منٹ پر حرمین شریفین انتظامیہ کے صدر دفتر میں مکہ مکرمہ میں رکھی گئی ہے۔
واضح رہے کہ حرمین شریفین انتظامیہ نے مسجد الحرام اور مسجد نبوی میں رمضان المبارک کے دوران لاکھوں زائرین کے استقبال، انہیں بہترین خدمات کی فراہمی اور سہولت کیلئے جامع منصوبہ تیار کیا ہے۔