منشیات فروش کے خلاف این ڈی پی ایس ایکٹ کے تحت مقدمہ درج:پولیس

سرینگر//
منشیات فروشوں کے خلاف جنگ کو جاری رکھتے ہوئے پولیس نے شمالی کشمیر کے ضلع بارہمولہ میں ایک انتہائی مطلوب اور بدنام زمانہ منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے مجاز اتھارٹی سے اجازت حاصل کرنے کے بعد ایک انتہائی اور بدنام زمانہ منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے ۔
ترجمان نے منشیات فروش کی شناخت عمر فاروق نجار ولد ولد فاروق احمد ساکن کلیابان شیری بارہمولہ کے طور پر کی ہے ۔
بیان میں کہا گیا کہ مذکورہ منشیات فروش کو سینٹرل جیل کوٹ بلوال جموں میں بند رکھا گیا ہے ۔
ترجمان نے بتایا کہ مذکورہ منشیات فروش کے خلاف کئی کیس درج ہیں اور وہ منشیات کے کاروبار اور کلیبان، شیری، فتح گڑھ اور ضلع کے دوسرے علاقوں کے نوجوانوں کو منشیات سپلائی کرنے میں ملوث تھا۔انہوں نے کہا کہ کئی کیسوں میں ملوث ہونے کے با وجود بھی وہ اپنی حرکتوں سے باز نہیں آیا۔
قابل ذکر ہے کہ بارہمولہ میں سال رواں کے پہلے مہینے یعنی ماہ جنوری کے دوران این ڈی پی ایس ایکٹ کے تحت۲۴مقدمے درج کرکے ۳سخت گیر منشیات فروشوں سمیت ۳۹منشیات فروشوں کو گرفتار کیا ہے اور ان کی تحویل سے لاکھوں روپیوں کا نشہ آور مواد ضبط کیا ہے ۔
ضلع میں منشیات کے خلاف وسیع پیمانے پر جنگ کو جاری رکھتے ہوئے پولیس نے سال۲۰۲۳کے دوران این ڈی پی ایس ایکٹ کے تحت۲۶۴مقدمے درج کرکے۴۶۴منشیات فروشوں کو گرفتار کیا۔