اونٹ رے اونٹ تیری کون سے کل سیدھی ہے ۔جی ہاں بات ٹیڑھے‘ میڑھے جانور اونٹ کی ہو رہی ہے…اور …اور اس لئے ہو رہی ہے کیونکہ ہمارا … ہم کشمیریوں کا حال اس جیسا ہی ہے… بالکل اونٹ جیسا کہ اللہ میاں کی قسم ہماری بھی کوئی کل سیدھی نہیں ہے… بالکل بھی نہیں ہے ۔روز گزشتہ اوڑی میں سڑک کے ایک حادثے میں دس لوگوں کی جان گئی… حادثے کی دیر تھی کہ سبھی نے حادثے کیلئے ڈرائیور کو ذمہ دار قراردیا اور… اور اس لئے قرار دیا کہ اس نے اپنی سومو گاڑی میں گنجائش سے کہیں زیادہ مسافروں کو چڑھادیا تھا… گاڑی میں مشکل سے گنجائش ڈرائیور سمیت دس کی تھی لیکن اس میں ۱۴ مسافر سوار تھے… یقینا غلطی ڈرائیور کی تھی… اسے ایسا نہیں کرنا چاہئے تھا … گنجائش سے زیادہ سواریوں کو گاڑی میں جانوروں کی طرح لاد کر اس نے مسافروں کی زندگیوں سے کھلواڑ کیا… لیکن صاحب بات یہیں پر ختم نہیں ہو تی ہے… بالکل بھی نہیں ہوتی ہے… اگر گاڑی کے ڈرائیور نے لالچ میں آکر زیادہ سے زیادہ مسافروں کو چڑھایا… گنجائش سے زیادہ مسافروں کو گاڑی میں سوار کیا تو… تو لوگ ‘ تو مسافر سوار کیوں ہو ئے … ڈرائیور بندوق کی نوک پر مسافروں کو گاڑی میں سوار تو نہیں کرتا ہے… مسافر اپنی مرضی سے گاڑی میں بیٹھ جاتے ہیں… یہ جاننے کے باوجود کہ گاڑی میں اتنی گنجائش نہیں ہے… وہ گنجائش سے زیادہ تعداد میں گاڑی میں سوار ہو تے ہیں… کہیں پہنچنے کی جلدی میں وہ گاڑیوں میں سوار ہو جاتے ہیں جہاں سے و ہ اپنی منزلوں کے بجائے اپنی آخری منزل کو پہنچ جاتے ہیں… ٹھہرئیے جناب !کہانی ابھی بھی ختم نہیں ہو ئی کہ … کہ اس کہانی میں ایک اور کردادر بھی ہے … ایک اہم کردار اور وہ ہے ٹریفک پولیس … مانتے ہیں کہ ٹریفک پولیس کا عملہ ہر جگہ موجود نہیں ہو سکتا ہے اور… اور اوڑی جیسے دور دراز علاقے میں موجود نہیں ہو گا… ہر وقت موجود نہیں ہو سکتا ہے… لیکن صاحب ایسا بھی نہیں ہے کہ اس علاقے میں گاڑیوں … مسافر گاڑیوں میں گنجائش سے زیادہ مسافروں کو سوار کیا جاتا ہو… یہ معمول بن گیا ہو ااور پولیس کو کانوں کان اس بات کی خبر نہ ہو… ایسا ممکن نہیں ہے… ڈرائیور کو زیادہ سواریاں چڑھانے کی لالچ ہے… لوگوں کو کہیں پہنچنے کی جلدی اور ٹریفک پولیس کی اپنی ذمہ داریوں اور فرائض کے تئیں غفلت اوڑی حادثے کی ہی نہیں بلکہ وادی کے دوسرے حصوں میں ہو رہے حادثوں کی وجوہات ہیں اور… اور اس لئے ہیں کہ اللہ میاں کی قسم ہم… ہم کشمیریوں کی کوئی کل سیدھی نہیں ہے… بالکل بھی نہیں ہے ۔ ہے نا؟
