حکومت کی تینوں شاخوں نے متفقہ طور پر آرٹیکل ۳۷۰ کو ختم کردیا:نائب صدر

جموں//
نائب صدر جگدیپ دھنکھر نے جمعرات کو کہا کہ حکومت کی تینوں شاخوں نے متفقہ طور پر آئین کے آرٹیکل ۳۷۰ کے تحت جموں و کشمیر کی خصوصی حیثیت کو ختم کرکے جن سنگھ کے بانی شیاما پرساد مکھرجی کا خواب پورا کیا۔
دھنکھر نے کہا کہ دفعہ ۳۷۰ایک ناسور بن چکا تھا جس کو ہمیشہ ہمیشہ کیلئے ختم کیا گیا۔انہوں نے کہاکہ اس قانون کی منسوخی سے شامیا پرساد مکھرجی کا خواب بھی شرمندہ تعبیر ہوا ہے ۔
ان باتوں کا اظہار نائب صدر ہند نے کٹھوعہ میں تقریب سے خطاب کے دوران کیا۔انہوں نے کہاکہ دفعہ۳۷۰؍اور دہشت گردی کو ختم کرنا آسان نہیں تھا۔
نائب صدر ہند نے کہاکہ آرٹیکل۳۷۰وہ قانون تھا جس کو آئین میں عارضی کہا گیا لیکن یہ قانون ہمارے لئے ناسور بن چکا تھا جس کو موجودہ حکومت نے ختم کیا اور سپریم کورٹ نے بھی منسوخی کا فیصلہ برقرار رکھا جس کے لئے وزیر اعظم مودی اور عدلیہ کو مبارکباد پیش کرتا ہوں۔
دھنکر نے مزید بتایا کہ دفعہ ۳۷۰کے باعث ہی جموں وکشمیر کے لوگوں کو مشکلات کا سامنا کرناپڑ رہا تھا لیکن اب یہ قانون ہمیشہ ہمیشہ کے لئے ختم ہو گیا ہے ۔ان کے مطابق سوچا بھی نہیں تھا کہ یہ قانون ختم ہوگا لیکن موجودہ حکومت نے جو کہا وہ کرکے بھی دکھایا ۔
نائب صدر نے مزید بتایا کہ آرٹیکل ۳۷۰کی منسوخی سے شاما پرساد مکھرجی کا سپنا بھی پورا ہوا ہے ۔
نائب صدر ہند کے مطابق شفاف اور احتساب اب مستقل حقیقت ہے ، مرکز ہر ممکن کوشش کر رہی ہیں کہ جموں وکشمیر کے نوجوانوں کو آگے بڑھنے کا موقع فراہم کیا جاسکے ۔انکے مطابق مرکزکی جانب سے یہ سعی کی جارہی ہیں کہ جموں وکشمیر میں کاروبار کے لئے سازگار ماحول بنایا جائے ۔
دھنکھر نے کہا’’آج یہاں کے لوگ امن کی پاسداری کر رہے ہیں ، کاروبار اور سرمایہ کاری کے لئے سازگار ماحول بنایا گیا اور جو لوگ قانون کی خلاف ورز ی کر رہے تھے وہ اس کا خمیازہ بھی بھگت رہے ہیں‘‘۔ انہوں نے مزید بتایا کہ آج کے دور میں جموں وکشمیر کے خواتین کو سبھی مراعات فراہم کی جارہی ہیں ۔
نائب صدر ہند نے کہاکہ ترقی کے مسائل پر سیاست نہیں ہونی چاہئے بلکہ اس ضمن میں حکوت کا ساتھ دینا چاہئے ۔