لیفٹیننٹ گورنر سنہاکا میلاد النبی کے موقع پر تہنیتی پیغام

سرینگر//
لیفٹیننٹ گورنر ‘منوج سنہا نے میلاد النبی کے موقع پر لوگوں کو اپنی مبارکباد اور نیک خواہشات کا اظہار کیا ہے۔
ایک پیغام میں لیفٹیننٹ گورنر نے کہا’’پیغمبر اسلام کے یوم ولادت کے پرمسرت موقع پر، میں سب کو مبارکباد پیش کرتا ہوں‘‘۔
سنہا نے کہا’’حضور نے ہمیں ہمدردی، امن، محبت، ہم آہنگی اور بھائی چارے پر مبنی مساوات پر مبنی معاشرے کا راستہ دکھایا۔ نبی پاک کی لازوال تعلیمات انسانیت کو احسان، مساوات اور عالمی بھائی چارے کی راہ پر گامزن کرتی رہتی ہیں‘‘۔
ایل جی کا مزید کہنا تھا’’ دعا ہے کہ میلاد النبی کا پرمسرت موقع سب کے لیے امن، خوشحالی اور خوشی لائے اور ہمیں صالح زندگی کی راہ پر چلنے اور سب کی فلاح و بہبود کے لیے کام کرنے کی ترغیب دے‘‘۔
ادھر صدر جمہوریہ دروپدی مرمو اور نائب صدر جگدیپ دھنکھڑ نے حضرت محمد کے یوم پیدائش عید میلاد النبی کے موقع پر شہریوں کو مبارکباد دی ہے اور پیغمبر اسلام کے ہم آہنگی اور بھائی چارے کے پیغام کو یاد رکھتے ہوئے انسانیت کے لیے مل کر کام کرنے کی اپیل کی ہے ۔
مرمو نے اپنے پیغام میں کہا’’میں تمام ہم وطنوں، خاص طور پر اپنے مسلمان بھائیوں اور بہنوں کو پیغمبر اسلام کے یوم پیدائش کی یاد میں منائے جانے والے میلاد النبی کے موقع پر مبارکباد پیش کرتی ہوں‘‘۔
صدر مملکت نے کہا کہ پیغمبر اسلام نے دنیا کو امن اور محبت کا پیغام دیا۔ ان کی تعلیمات ہمیں ہم آہنگی اور بھائی چارے سے رہنے کی ترغیب دیتی ہیں۔
مرمو نے کہا’’آئیے ہم ان کے نظریات کو یاد کریں اور انسانیت کی فلاح کے لیے مل کر کام کریں‘‘۔
میلاد النبی کے پرمسرت موقع پر تمام ہم وطنوں کو نیک خواہشات پیش کرتے ہوئے دھنکھڑ نے کہا’’پیغمبر کی متاثر کن تعلیمات ہمدردی، رواداری اور باہمی بھائی چارے کی زندہ مثال ہیں‘‘۔
نائب صدر نے کہا ’’پیغمبر اسلام کی تعلیمات امن، انصاف اور ہم آہنگی کے معاشرے کی تعمیر میں ہماری رہنمائی کرتی رہیں‘یہی خواہش ہے ۔‘‘