پاک بھارت میچ؛ کوہلی کی پاکستانی کھلاڑیوں سے خوش گپیوں کی تصاویر وائرل

پالی کیلے//
ایشیاکپ میں پاک بھارت ٹاکرے سے قبل قومی کرکٹرز اور ویرات کوہلی کی پریکٹس سیشن کے دوران خوش گپیوں کی تصاویر سوشل میڈیا پر وائرل ہوگئیں۔
سماجی رابطے کی سائٹ ٹوئٹر پر سابق بھارتی کپتان ویرات کوہلی اور پاکستانی کرکٹرز کے درمیان پریکٹس سیشن کے دوران خوشگوار ماحول میں ملاقات ہوئی، جس کی تصاویر اور ویڈیو سوشل میڈیا پر تیزی سے وائرل ہورہی ہیں۔
سائیڈ لائن ملاقات میں بھارتی کرکٹرز پاکستان پلئیرز سے ملے اور ایک دوسرے کا حال پوچھا جبکہ ہنسی مذاق کرتے ہوئے بھی نظر آئے۔
بھارتی ٹیم کے اسٹار کھلاڑی ویرات کوہلی پاکستانی کھلاڑیوں میں گُھل مل گئے، پاکستانی آل راؤنڈر شاداب خان، فاسٹ بولر شاہین آفریدی اور وکٹ کیپر بیٹر محمد رضوان سے ملاقات کی جبکہ شاداب خان کا بیٹ بھی چیک کیا۔
واضح رہے کہ کینڈی کے پالی کیلے اسٹیڈیم میں آج پاکستان اور بھارت کے درمیان میچ دوپہر 2:30 بجے مدمقابل آئیں گی۔