عدالت میں۷۳۶۶گاڑیوں کے ای چالان زیر التوا

سرینگر///
ٹریفک پولیس حکام نے زائد از۷ہزار گاڑیوں کے مالکان پر زور دیا ہے کہ وہ۹؍اگست تک اپنے زیر التوا ای چالان نمٹا دیں بصورت دیگر ان کی گاڑیوں کو ضبط کیا جائے گا۔
ایس ایس پی ٹریفک سرینگر‘ مظفر احمد شاہ نے ایک عدالتی حکم کے حوالے سے ایک پبلک نوٹس جاری کیا جس میں کہا گیاہے’’اس دفتر کو اسپیشل موبائل مجسٹریٹ (ٹریفک) سرینگر کی عدالت کے ذریعہ۲۸ جولائی۲۰۲۳کو ایک عدالتی حکم وصول ہوا جس کے ساتھ۷ہزار۳سو۶۶گاڑیوں کی فہرست منسلک تھی جس میں ہر ایک گاڑی کے خلاف زیر التوا ای کورٹ چالان دکھایا گیا تھا‘‘۔
نوٹس میں کہا گیا’’عدالتی حکم میں ہدایت دی گئی تھی کہ ان گاڑیوں کے مالکان کو۹؍اگست۲۰۲۳تک ان کے ای چالان نمٹانے کے متعلق مطلع کیا جائے ‘‘۔
ٹریفک پولیس کی نوٹس میں کہا گیا’’اس کو مد نظر رکھتے ہوئے عدالت کی طرف سے جاری کردہ گاڑیوں کی فہرست کو زیر التوا چالان کے ساتھ عوام میں اس ہدایت کے ساتھ مشتہر کیا جاتا ہے کہ ان گاڑیوں کے مالکان/خلاف ورزی کرنے والے۹؍اگست۲۰۲۳تک یا اس سے قبل چالان نمٹانے کیلئے خصوصی موبائل مجسٹریٹ ٹریفک سرینگر میں عدالت میں حاضر ہوجائیں‘‘۔
نوٹس میں کہا گیا کہ ایسا کرنے میں ناکامی پر خلاف ورزی کرنے والوں کے خلاف تحت قانون سخت کارروائی انجام دی جائے گی۔