یاسین ملک کی سپریم کورٹ میں حاضری

سرینگر//
سپریم کورٹ کی جانب سے علیحدگی پسند تنظیم‘جموں و کشمیر لبریشن فرنٹ (جے کے ایل ایف) کے سربراہ اور ٹیرر فنڈنگ کیس میں تا حیات (عمر قید) سزا سنائے جانے والے محمد یاسین ملک کی عدالت عظمیٰ میں فزیکل موجودگی پر تشویش کا اظہار کرنے کے ایک دن بعد، تہاڑ جیل کے منتظم نے ہفتے کے روز چار اہلکاروں کو معطل کر دیا۔
معطل کیے گئے اہلکاروں میں ڈپٹی سپرنٹنڈنٹ‘دو اسسٹنٹ سپرنٹنڈنٹ اور ایک ہیڈ وارڈن شامل ہیں۔
یاد رہے کہ سالیسٹر جنرل تشار مہتا نے جمعہ کو کشمیر کے علیحدگی پسند رہنما محمد یاسین ملک کے سپریم کورٹ میں پیش کیے جانے کے بعد سپریم کورٹ کی سیکورٹی میں ’سنگین کوتاہی‘ کو نشان زد کیا۔
مہتا نے مرکزی داخلہ سیکریٹری اجے بھلا کو خط لکھا جس میں کہا گیا ’’یاسین ملک کو لانے والے جیل حکام نے سپریم کورٹ کی سیکورٹی سے سمجھوتہ کیا ہے۔‘‘ خط میں کہا گیا تھا ’’یہ میرا پختہ نظریہ ہے کہ یہ ایک سنگین سیکورٹی کوتاہی ہے۔ یاسین ملک جیسا دہشت گرد اور علیحدگی پسند سوچ کا حامل شخص، جو نہ صرف دہشت گردی کی فنڈنگ کیس میں سزا یافتہ ہے بلکہ پاکستان میں دہشت گرد تنظیموں کے ساتھ روابط کے بارے میں جانتا ہے، فرار ہو سکتا تھا، زبردستی لے جایا جا سکتا تھا یا مارا جا سکتا تھا۔‘‘
قبل ازیں، جمعہ کو سپریم کورٹ کے ججز نے یاسین ملک کی فزیکل پیشی پر سخت برہمی کا اظہار کیا تھا۔ جیسے ہی کیس کی سماعت شروع ہوئی، جسٹس سوریہ کانت اور دیپانکر دتہ کی بنچ نے کہا کہ ’’جسٹس دتہ اس معاملے کی سماعت نہیں کر سکتے۔‘‘
غور طلب ہے کہ تہاڑ انتظامیہ نے جمعہ کو سپریم کورٹ میںیاسین ملک کے ذاتی طور پر پیش ہونے پر عدالت کی جانب سے ناراضگی ظاہر کرنے کے بعد تحقیقات کا حکم دیا ۔ اس معاملے میں جیل ہیڈ کوارٹر کے انسپکٹر جنرل راجیو سنگھ، قصوروار افسران کا فیصلہ کریں گے۔ اس معاملے میں تین دن میں رپورٹ پیش کرنے کو کہا گیا ہے۔ معلوم ہوا کہ سینٹرل جیل نمبر۷ میں بند یاسین ملک کی پیشی کے معاملے میں حکام کی جانب سے بڑی کوتاہی ہوئی ہے۔