بارہمولہ ضلع میں امسال اب تک ۳۱۸ منشیات فروشوں کو گرفتار کیا گیا

بارہمولہ//
بارہمولہ پولیس نے امسال لائن آف کنٹرول (ایل او سی) کے ساتھ اوڑی سے لے کر بارہمولہ کے دیگر حصوں میں مختلف مقامات پر منشایات کے خلاف کارروائی کرتے ہوئے۳۱۸منشیات فروشوں کو گرفتار کیا ہے‘جس دوران بھاری مقدار میں منشیات کو بھی ضبط کر لیا گیا ہے۔
اس حوالے سے بارہمولہ کے سینئر سپرنٹنڈنٹ آف پولیس‘امود اشوک ناگپورے نے کہا کہ شمالی کشمیر کا بارہمولہ ضلع ایک سرحدی ضلع ہے اور سرحد پار سے منشیات اور ہتھیاروں کی اسمگلنگ سکیورٹی فورسز کے لیے ایک بڑا چیلنج ہے۔
ناگپورے نے کہا کہ گزشتہ چھ ماہ کے دوران این ڈی پی ایس ایکٹ کے تحت بارہمولہ پولیس نے۱۸۷؍ایف آئی آر درج کیں۔ اس کے علاوہ پولیس نے تقریباً۲۸۴منشیات فروشوں کو گرفتار کیا اور دیگر ۳۴ بدنام زمانہ منشیات فروشوں کے خلاف مقدمہ درج کیا گیا ہے۔
ایس ایس پی نے کہا کہ مجموعی طور پر پولیس نے ۳۱۸؍افراد کو این ڈی پی ایس ایکٹ کے تحت گرفتار کیا ہے۔انہوں نے کہا کہ پولیس منشیات کے کلچر کے خلاف کریک ڈاؤن جاری رکھے گی اور پولیس کی یہی کوشش ہوگی کہ ضلع کو کو منشیات سے پاک بنایا جائے۔
ناگپورے نے کہا کہ حال ہی میں پولیس نے ایک بدنام زمانہ منشیات فروشوں کی جائیدادیں، جن میں ایک گھر اور ایک گاڑی شامل ہے کو اٹیچ کیا ہے۔
ایس ایس پی بارہمولہ نے مزید بتایا کہ پولیس نے ٹیمیں تعینات کی ہیں جو خطے میں سرگرم ڈرگ مافیا کے بارے میں اہم انٹیلی جنس انپٹس حاصل کرے گی اور بعد میں ان کے خلاف سخت کارروائی کی جائے گئی۔
ناگپورے نے کہا کہ خطے میں منشیات سے متعلق بڑھتے ہوئے جرائم سے نمٹنے کی فوری ضرورت ہے اور اس کے لیے عوام کے سپورٹ کی ضرورت ہے انہوں نے کہا کہ کوئی بھی شہری پولیس کو منشیات فروش کے بارے میں معلومات دے سکتا ہے اور اس کے لیے پولیس ان کی حوصلہ افزائی کرے گی۔