سرینگر//
جموں کشمیر پولیس کے خصوصی تحقیقاتی یونٹ (ایس آئی یو) نے منگل کو دو ملزموں ‘جن میں ایک سرگرم ملی ٹینٹ اور جنگجو معاون شامل ہے‘ کے خلاف این آئی اے کورٹ سرینگر میں میں چارج شیٹ پیش کی۔
پولیس کے ایک ترجمان نے بتایا کہ ایس آئی یو نے ایف آئی آر ز۲/۲۰۲۳کے سلسلے میں آج این آئی اے کی خصوصی عدالت میں دو ملزمان کے خلاف چارج شیٹ پیش کیا ہے۔
ترجمان نے بتایا کہ دس جنوری۲۰۲۳کو ریگل چوک سری نگر میں پولیس پارٹی نے ایک سکوٹر کو روک کراس پر سوار فرزان فیروز ولد فیروز احمد میر ساکن فرستہ بل پانپور کی گرفتاری عمل میں لا کر اس کے قبضے سے نیلے رنگ کا ایک بیگ برآمد کیا جس میں قابل اعتراض اشیا برآمد ہوئی۔
پولیس نے اس ضمن میں ایف آئی آر زیر نمبر ۲/۲۰۲۳کے تحت کیس درج کرکے مزید تحقیقات شروع کی۔
ترجمان کے مطابق تفتیش کے دوران پتہ چلا کہ مذکورہ نوجوان قابل اعتراض اشیاء جس میں ہیروئن اور نقدی نو لاکھ پچاس ہزار روپیہ ، لشکر طیبہ کے لیٹر پیڈ شامل ہیں ، پاکستان میں بیٹھے لشکر ملی ٹینٹ اویس احمد میر کی ہدایت پر لے جار ہاتھا تاکہ تخریبی سرگرمیوں کو انجام دیا جاسکے۔
ترجمان نے کہاکہ تحقیقات کے دوران معلوم ہوا ہے کہ ایک موٹر سائیکل کو دہشت گرد سرگرمیوں کے لئے استعمال میں لایا جارہا ہے کو بھی ضبط کیا گیا۔ترجمان نے بتایا مزید تحقیقات کے دوران مفرور ملزم کی تلاش شروع کی گئی اور یہ پایا گیا کہ مذکورہ ملزم جس کی شناخت اویس فاروق ( سرگرم جنگجو) ولد فیروز احمد میر ساکن فرستہ بل پامپور حال پاکستان اس کے خلاف درج مقدموں میں گرفتاری سے بچنے کے لئے اپنے آپ کو چھپا رہا ہے۔
اس سلسلے میں معزز عدالت میں ملزم کے خلاف اعلانیہ کارروائی شروع کرنے کی خاطر رپورٹ جمع کی گئی ہے تاکہ سیکشن ۸۲؍اور ۸۳سی آر پی سی کے تحت کارروائی شروع کی جاسکے۔اس کیس کی تحقیقات مکمل کی گئی تاہم دیگر ملزمان کے ملوث ہونے کو بھی مسترد نہیں کیا جاسکتا لہذا سیکشن۱۷۳(۸)سی آر پی سی کے تحت تفتیش جاری رہے گی۔
