چاقو سے حملہ کرنے والے شخص کی تلاش بڑے پیمانے پر جاری

سرینگر/
جموںکشمیر کے وسطی ضلع بڈگام کے چاڈورہ کانیرا پارک میں ہفتے کی شام کو نوجوان پر چاقو سے حملہ کیا گیا جس کے نتیجے میں وہ زخمی ہوا ہے ۔
معلوم ہوا ہے کہ پولیس نے کیس درج کرکے حملہ آور کی تلاش شروع کی ہے ۔
اطلاعات کے مطابق ہفتے کی شام کو چاڈورہ کے کانیرا پارک میں نامعلوم افراد نے۱۹سالہ مومن احمد بٹ ولد غلام محمد بٹ ساکن دریگام پر چاقو سے حملہ کیا جس کے نتیجے میں وہ خون میں لت پت ہوا ۔
معلوم ہوا ہے کہ آس پاس موجود لوگوں نے زخمی نوجوان کو علاج ومعالجہ کی خاطر ہسپتال منتقل کیا جہاں پر اس کی مستحکم بتائی جارہی ہے ۔
پولیس کے ایک سینئر آفیسر نے یو این آئی اردو کو بتایا کہ ہفتے کی شام کو چاڈورہ کے کانیرا پارک میں نوجوان پر چاقو سے حملہ کیا گیا جس کے نتیجے میں نوجوان زخمی ہوا ہے ۔انہوں نے کہاکہ حملہ آور کی شناخت کی خاطر تحقیقات شروع کی گئی ہے اور بہت جلد اس کو سلاخوں کے پیچھے دھکیل دیا جائے گا۔
پولیس آفیسر نے بتایا کہ اس ضمن میں ایف آئی آر زیر نمبر۱۲۷زیر دفعہ۳۰۷کے تحت کیس درج کرکے مزید تحقیقات شروع کی گئی ۔
بتادیں کہ۳۰جون کو گنج بخش پارک نوہٹہ میں بھی نوجوان کے سر پر چاقو سے حملہ کیا گیا جس کے نتیجے میں وہ شدید طورپر زخمی ہوا تھا۔
پولیس نے فوری کارروائی عمل میں لا کر حملہ آور کو دھر دبوچ کر سلاخوں کے پیچھے دھکیل دیا ۔
وادی کشمیر میں پچھلے کچھ مہینوں سے چھرا زنی کے مسلسل واقعات رونما ہو رہے ہیں اور ان واقعات کی روک تھام کی خاطر سماج کے ہر فرد کو آگے آنا چاہئے ۔