ٹنگمرگ میں اینٹی کرپشن بیورو نے کلرک کو رشوت لیتے ہوئے رنگے ہاتھوں گرفتار کیا

سرینگر//
جموںکشمیر اینٹی کرپشن بیورو (اے سی بی ) نے نائب تحصیلدار آفس ٹنگمرگ اہر بل کولگام میں تعینات کلرک کو سات ہزار روپے کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اے سی بی کے ایک ترجمان نے بتایا کہ اینٹی کرپشن بیورو میں سائل نے تحریری طورپر شکایت درج کی کہ نائب تحصیلدار آفس ٹنگمرگ اہر بل کولگام میں تعینات کلرک لیاقت رحیم پسوال ولد عبدالرحیم ساکن ٹنگمرگ اہر بل شیڈول کاسٹ سرٹیفکیٹ کی اجرائی کی خاطر سات ہزار روپے کی رشوت طلب کر رہا ہے ۔
اے سی بی کے مطابق سائل نے بتایا کہ اُس نے کلرک کو پہلی قسط کے بطور۳۵۰۰روپے کی رقم فراہم کی ہے اور اب وہ مزید۳۵۰۰روپے کی رشوت طلب کررہا ہے ۔
شکایت ملتے ہی اے سی بی نے اس ضمن میں ایف آئی آر زیر نمبر۲۰۲۲/۶کے تحت کیس درج کرکے تحقیقات شروع کی ۔
ترجمان نے بتایا کہ اے سی بی نے ایک جال بچھایا جس دوران لیاقت رحیم پسوال نامی کلرک کو سائل سے ۳۵۰۰ روپے کی رقم لیتے ہوئے رنگے ہاتھوں گرفتار کیا گیا ۔
اے سی بی ترجمان نے کہاکہ آزاد گواہوں کی موجودگی میں کلرک سے رشوت کی رقم ضبط کی گئی ہے ۔اس سلسلے میں مزید تحقیقات جاری ہے ۔