’یو ٹی کا ٹورزم ملک کے کثیر الثقافتی اقدار کا عکاس ‘

سرینگر//
جموںکشمیر کے لیفٹیننٹ گورنر‘ منوج سنہا کا کہنا ہے کہ جموں کشمیر یونین ٹریٹری کی سیاحت ملک کے کثیر الثقافتی اور کثیر مذہبی اقدار کی عکاسی کرتی ہے ۔
سنہانے کہا کہ یونین ٹریٹری کے نوجوان اپنے اور قوم کے لئے ایک تابناک مستقبل تحریر کر رہے ۔ان کا کہنا تھا کہ جموں وکشمیر میں تعمیر وترقی کی رفتار اور اس کا پیمانہ حیران کن ہے ۔
لیفٹیننٹ گورنر نے ان باتوں کا اظہار منگل کے روز یہاں ایس کے آئی سی سی میں جی ٹونٹی ٹورزم ورکنگ گروپ اجلاس سے اپنے خطاب کے دوران کیا۔
سنہانے کہا کہ جموںکشمیر وزیر اعظم نریندر مودی کی قیادت میں ایک نئے دور سے گذر رہا ہے اور یہاں ترقی اور امن کے لامحدود امکانات روشن ہوئے ہیں۔ان کا کہنا تھا’’جموںکشمیر کی ٹورزم ہمارے ملک کے کثیر الثقافتی اور کثیر مذہبی اقدار کی عکاسی بھی کرتی ہے ‘‘۔
سنہا نے امن، ترقی اور سیاحت کی اہمیت پر روشنی ڈالتے ہوئے کہا کہ شعبہ سیاحت تنہا ترقی کی منزلیں طے نہیں کر سکتا ہے ۔انہوں نے کہا کہ شعبہ سیاحت کی ترقی کیلئے اچھے بنیادی ڈھانچے ، ٹھوس منصوبے اور موثر اور جواب دہ انتظامیہ کا ہونا لازمی ہے ۔ان کا کہنا تھا کہ صرف امن اور خوشحالی سے ہی مہمان نوازی میں گرمجوشی آسکتی ہے ۔
لیفٹیننٹ گورنر نے کہا کہ آج جموں وکشمیر ملک کے ترقی یافتہ خطوں میں سے کچھ قابل پیمائش سنگ میلوں پر کھڑا ہے ۔انہوں نے کہا کہ یو ٹی انتظامیہ لوگوں کی معاشی و سماجی خوشحالی کیلئے پر عزم ہے ۔
سنہاکا کہنا تھا’’وزیر اعظم نریندر مودی نے استحصال‘نا انصافی اور بھید بھائو کو مکمل طور پر جڑ سے اکھاڑ دیا جس سے ہمارے سماج کے کئی طبقے گذشتہ سات دہائیوں سے دوچار تھے ‘‘۔انہوں نے کہا کہ گذشتہ چار برسوں کے دوران پائیدار ترقی کے منازل طے کرنے میں جموں کشمیر کی درجہ بندی میں اضافہ درج ہوا ہے جس کیلئے ہم وزیر اعظم کی وژنری قیادت کے مشکور ہیں۔
لیفٹیننٹ گورنرنے کہا’’دنیا دیکھ سکتی ہے کہ پوارا معاشرہ، خاص طور پر نوجوان نسل اپنے اور قوم کے لئے روشن مستقبل تحریر کر رہی ہے جموں وکشمیر میں تعمیر و ترقی کی رفتار اور اس کا پیمانہ حیران کن ہے اوربنیادی ڈھانچے کے منصوبوں کی تکمیل پر عمل در آمد کی رفتار قریب دس فیصد بڑھ گئی ہے ‘‘۔
ایل جی نے کہا کہ جی ٹونٹی اجلاس شاندار چوٹیوں، صاف وشفاف جھیلوں اور سر سبز و شاداب مناظر کی سرزمین منعقد ہو رہا ہے ۔انہوں نے کہا کہ جموں وکشمیر محض ایک سیاحتی مقام نہیں ہے بلکہ اس سے بھی کچھ بڑھ کر ہے ۔ان کا کہنا تھا’’جموں وکشمیر ایک شاعری ہے یہ احساس کی سرزمین ہے یہ توانائی کا وہ میدان ہے جو برس ہا برس سے بھارتی ثقافتی اقدار کے ساتھ مرتعش ہو رہا ہے ‘‘۔
لیفٹیننٹ گورنر نے کہا کہ سال گذشتہ ۱۸ملین کی ریکارڈ تعداد میں سیاحوں نے جموں وکشمیر کی سیر کی۔انہوں نے کہا کہ ہم نے گرین ٹورزم کے فروغ کیلئے۳سو نئے مقامات کی نشاندہی کی ہے اور پائیدار ٹورزم سیکٹر کو یقینی بنانے کے لیے نوجوانوں اور خواتین انٹراپرنیورز کا تعاون حاصل کیا جا رہا ہے ۔
سنہا نے کہا کہ قریب چار دہائیوں کے طویل عرصے کے بعد یونین ٹریٹری انتظامیہ نے بالی ووڈ کے ساتھ رشتہ بحال کیا ہے ۔انہوں نے کہا کہ ۲۰۲۱میں ہم نے فلم پالیسی لانچ کی تاکہ اس سیکٹر میں زیادہ سے زیادہ سرمایہ کاری کو یقینی بنایا جا سکے ۔
لیفٹیننٹ گورنرنے کہا کہ سال گذشتہ یہاں زائد از۳سو فلموں کی شوٹنگ ہوئی۔انہوں نے کہا’’ہمارا مقصد خطے کے مقبول مقامات کو مزید پائیدار بنانا اور یہاں کے دلکش ورثہ سائئٹس کی خوبصورتی کو محفوظ رکھنا ہے‘‘۔ان کا کہنا تھا کہ وزیر اعظم کی قیادت میں جموں وکشمیر بہت جلد دنیا کے۵۰بڑے سیاحتی مقامات میں جگہ بنا لے گا اور یہ بین الاقوامی سیاحوں کے ٹرول بک لسٹ میں عنقریب شامل ہوگا۔