2000 روپے کے نوٹ کو بند کرنے کی بی جے پی کی سیاسی چال: اسٹالن

چنئی// تمل ناڈو کے وزیر اعلیٰ اور دراوڑ منیترا کزگم (ڈی ایم کے ) کے صدر ایم کے اسٹالن نے 2000 روپے کے نوٹ کو پبلک سرکولیشن سے نکالنے پر مرکزی حکومت کی سرزنش کرتے ہوئے ہفتہ کو اسے کرناٹک اسمبلی میں بھارتیہ جنتا پارٹی (بی جے پی) کے خراب کارکردگی کو چھپانے کی سیاسی چال قرار دیا۔
مرکزی حکومت کے فیصلے پر ردعمل ظاہر کرتے ہوئے مسٹر اسٹالن نے ایک ٹویٹ میں کہاکہ "500 اندیشے ، 1000 راز اور 2000 غلطیاں”۔ اسے وزیر اعظم نریندر مودی کی قیادت والی حکومت کے دوسرے نوٹ بندی کے اقدام کے طور پر دیکھا جا رہا ہے ۔
انہوں نے کہاکہ "کرناٹک اسمبلی انتخابات میں قابل رحم ناکامی کو چھپانے کی یہی چال”۔
دریں اثنا، ڈی ایم کے کے ڈپٹی جنرل سکریٹری اور لوک سبھا ایم پی کنی موزی نے 2,000 روپے کے نوٹ کی تصویر پوسٹ کرتے ہوئے مرکز میں برسراقتدار بی جے پی کو نشانہ بناتے ہوئے کہا کہ "وہ جو بناتا ہے ، وہ تباہ کردیتا ہے "۔