جی ۲۰؍ اجلاس کی تیاریوں کا جائزہ

سرینگر//
پولیس کشمیر زون کے ایڈیشنل ڈائریکٹر جنرل وجے کمار نے ڈویڑنل کمشنر کشمیر وجے کمار بدھوری کے ساتھ کشمیر میں جی۲۰ میٹنگ کے انتظامات پر تبادلہ خیال کرنے کیلئے فیلڈ افسران کے ساتھ ایک جائزہ میٹنگ کی۔
اے ڈی جی پی اور صوبائی کمشنر کو متعلقہ افسران نے جی۲۰؍اجلاس کے محفوظ اور پرامن انعقاد کیلئے کیے گئے ضروری انتظامات کے بارے میں بریفنگ دی۔
ایک پولیس بیان میں کہا گیا’’میٹنگ کے دوران، اے ڈی جی پی کشمیر اور صوبائی کمشنر کشمیر نے شرکت کرنے والے افسران کو ہدایت دی کہ وہ اس بات کو یقینی بنائیں کہ مجسٹریٹوں کی تعیناتی اور پولیس کے انتظامات کو سربراہی اجلاس سے پہلے اچھی طرح سے رکھا گیا ہے اور حساس مقامات پر حفاظتی اقدامات کو بڑھانے کی ضرورت کو دہرایا گیا تاکہ کسی بھی خطرے سے بچا جا سکے۔ اس کے علاوہ، دہشت گردی کی کسی بھی نقل و حرکت کو روکنے کے لیے خاص طور پر رات کے اوقات میں مشترکہ گشت بڑھانے کی ہدایت کی گئی‘‘۔
افسران کو مزید مشورہ دیا گیا کہ وہ سول انتظامیہ کے ساتھ زمینی سطح پر ہم آہنگی کا مظاہرہ کریں۔
بیان میں کہا گیا’’انہوں نے سول انتظامیہ کو یہ بھی ہدایت کی کہ وہ اپنے متعلقہ دائرہ اختیار والے پولیس افسران کے ساتھ قریبی رابطے میں رہیں تاکہ وہ کامیاب جی ۲۰؍ اجلاس کیلئے اپنی ذمہ داریوں کے اپنے علاقے میں کسی بھی ہنگامی صورتحال کو پورا کریں۔
پولیس نے کہا’’تمام مجسٹریٹس اور پولیس افسران کو ہدایت دی گئی کہ وہ افواہ پھیلانے والوں کی شناخت کریں اور حفاظتی اقدامات کریں۔‘‘
دریں اثنا جی ۲۰سربراہ اجلاس پورے ملک کے لئے تاریخی موقعہ ہے، لیکن جموں وکشمیر میں ٹورازم ورکنگ گروپ کا یہ اجلاس کئی معنوں میں اہمیت کا حامل ہے۔ لہذا تیاریوں میں کوئی کسر نہ باقی رہے اس لیے سرکاری افسران ہر چیز کو بڑی باریکی سے دیکھ رہے ہیں۔
محکمہ سیاحت، لیکس کنزرویشن اینڈ منیجمنٹ اتھارٹی اور دیگر متعلقہ محکمہ کے افسران ہر چیز کو بین الاقوامی سطح کا بنا رہے ہیں تاکہ کشمیر کو بہترین اور خوبصورت انداز میں پیش کیا جائے۔
۲۰ ممالک کے مندوبین کا جھیل کی سیر کے پیش نظر محکمہ لیک کنزرویشن اینڈ منیجمنٹ اتھارٹی جھیل ڈل کو جاذب نظر بنانے کے لیے صفائی ستھرائی عمل میں لارہا ہے۔ڈل کے ایک بڑے حصے کو پہلے ہی صاف کیا جاچکا ہے اور دوسرے حصے پر صفائی کا کام شدومد سے جاری۔
جھیل ڈل کو خودرو گھاس پھوس اور لیلی سے پاک و صفائی کرنے کے لیے اس وقت کئی مقامات پر افراد قوت کے ساتھ مشینوں کو بھی کام پر لگایا گیا ہے۔متعلقہ محکمے کی جانب سے اگرچہ جھیل ڈل میں سال بھر صفائی ستھرائی کا کام انجام دیا جاتا ہے، لیکن جی۲۰ سربراہ اجلاس کو ملحوظ رکھتے ہوئے کئی اہم مقامات کی صفائی پر خصوصی توجہ مرکوز کی گئی ہے۔
مندوبین کے جھیل ڈل کی سیر کو یادگار بنانے کے لیے لیک کنزرویشن اینڈ منیجمنٹ اتھارٹی اور محکمہ سیاحت نے کئی اہم اقدامات اٹھائے ہیں۔ڈل کے ان خوبصورت اور پْرکیف نظاروں سے لطف اندوز ہونے کے لیے شکارا کو سجانے کا کام بھی انجام دیا جارہا ہے۔
محکمہ سیاحت کی جانب سے ۷۰ سے زائد شکارا مندوبین کی سیر کے لیے دستیاب رکھے گئے ہیں۔رنگ و روغن کے علاوہ ان میں لائٹنگ سسٹم نصب کیا جارہا ہے جبکہ دیگر آرائشی سازوسامان سے بھی شکاروں کو پْر کشش بنایا جارہا ہے۔
شکارا والے بھی بے حد خوشی اور مسرت کا اظہار کرتے ہوئے کہتے ہیں کہ یہ کشمیر کے لیے تاریخی موقعہ ہے۔منعقد ہونے والے جی ۲۰سمٹ سے نہ صرف سیاحتی شعبے کو نئی جہت ملی گی، بلکہ بین الاقوامی سیاحت کو بھی فروغ حاصل ہوگا۔ تاہم انہوں نے کہا کہ تمام چیزوں کو مندوبین کے سامنے بہتر اور موثر انداز میں پیش کرنے کی ضرورت ہے۔