سناتن محض ایک لفظ نہیں ہے ، یہ ہمیشہ نیاہے ، تبدیل ہونے والا ہے : مودی

بھج*// وزیر اعظم نریندر مودی نے جمعرات کو کہا کہ سناتن محض ایک لفظ نہیں ہے ، یہ ہمیشہ نیا ہے ، قابل تبدیل ہے اوراس میں ماضی سے ہی خود کوبہتر بنانے کی شدید خواہش رہی ہے ، اسی لئے یہ لا زوال اور ابدی ہے ۔
مسٹرمودی نے کڑوا پاٹیدار سماج کی 100 سالگرہ پرسناتنی شتابدی مہوتسو میں ورچوئل طریقے سے حصہ لیتے ہوئے اپنے خطاب میں کہا، ‘‘یہ میرے کچھی پٹیل کچھ کا ہی نہیں، بلکہ اب پورے ہندوستان کا فخر ہے ، کیونکہ میں یہاں کے کسی بھی کونے میں جاتا ہوں، تو وہاں اس سماج کے لوگ دیکھنے کو ملتے ہیں۔ اس لئے تو کہاجاتا ہے کہ کچھڑو کھیلے کھلک میں جو مہاساگر میں مچھ، جے تے ہدو کچھی وسے اتے ریاڈی کچھ۔
انہوں نے پروگرام میں موجود شارداپیٹھ کے جگد گرو شنکراچاریہ سوامی سدانند سرسوتی، گجرات کے وزیر اعلی بھوپیندر بھائی پٹیل، مرکزی وزیر پرشوتم روپالا، آل انڈیا کچھ کڑوا پاٹیدار سماج کے صدر ابجی بھائی وشرام بھائی کنانی اور دیگر عہدیداروں اورہندوستان و بیرون ملک سے وابستہ لوگوں کو سناتنی شتابدی مہوتسو کے لیے نیک خواہشات کا اظہار کیا۔
انہوں نے کہا، "آج میرے لیے سونے پر سہاگہ ہے ۔ میرے لیے یہ پہلا موقع ہے ، جب مجھے جگدگروشنکراچاریہ سرسوتی جی کی موجودگی میں ان کے عہدہ سنبھالنے کے بعد کسی پروگرام میں شرکت کا موقع ملا ہے ۔ ان کی شفقت ہمیشہ مجھ پررہی ہے ، ہم سب پر رہی ہے ، اس لیے آج مجھے انہیں پرنام کرنے کا موقع ملا ہے ۔
انہوں نے کہا کہ سماج کی خدمت کے 100 سال مکمل ہونے ، یوتھ ونگ کے 50 سال اور خواتین ونگ کے 25 سال مکمل ہونے کی یہ جو تریوینی ہے ، یہ اپنے آپ میں خوش گوار اتفاق ہے ۔ جب کسی معاشرے کے نوجوان، اس سماج کی مائیں-بہنیں، اپنے معاشرے کی ذمہ داری اپنے کندھے پر لیتی ہیں، تو کامیابی اور خوشحالی یقینی ہو جاتی ہے ۔ مجھے خوشی ہے کہ شری اکھل بھارتیہ کچھ کڑوا پاٹیدار سماج کے نوجوان اور خواتین ونگ کی یہ وفاداری اس مہوتسو کے طور آج چاروں طرف نظر آرہی ہے ۔