میامی// سوئس ٹینس لیجنڈ راجر فیڈرر نے رافیل نڈال کے فرنچ اوپن کے لیے صحت یاب ہونے کی امید ظاہر کرتے ہوئے کہا کہ اگر 14 بار کے رولاں گیرو چیمپئن اس سال ٹورنامنٹ سے غیر حاضر رہتے ہیں تو یہ ٹینس کے لیے ایک "بڑا” دھچکا ہوگا۔
نڈال جنوری میں ہونے والے آسٹریلیائی اوپن کے دوران کولہے کی انجری کا شکار ہیں اور انہیں خدشہ ہے کہ وہ اس ٹورنامنٹ سے باہر ہو سکتے ہیں جہاں انہوں نے سب سے زیادہ گرینڈ سلیم ٹائٹل جیتے ہیں۔ وہ گزشتہ ہفتے کھیلے گئے میڈرڈ اوپن اور اس ہفتے کھیلے جانے والے اٹالین اوپن سے بھی باہر رہے ہیں۔
اپنے شاندار کیرئیر میں 20 گرینڈ سلیم ٹائٹل جیتنے والے فیڈرر نے اتوار کو اسکائی اسپورٹس سے بات چیت کرتے ہوئے کہا کہ ’’یہ بہت برا ہوگا، اگر رافا وہاں نہیں ہوں گے تو ٹینس کے کھیل کے لیے یہ مشکل صورتحال ہوگی۔‘‘
انہوں نے مزید کہا، "میں اب بھی ان کی صحت یابی اور واپسی کے لیے پر امید ہوں، میں نے دیکھا ہے کہ وہ روم (اطالوی اوپن) سے باہر ہوگئے ہیں۔ میں ان کے لیے نیک خواہشات کا اظہار کرتا ہوں،”
گزشتہ سال ٹینس سے ریٹائر ہونے والے فیڈرر نے کہا کہ "ظاہر ہے، نوواک (جوکووچ) زیادہ نہیں کھیل رہے ہیں، اس لیے مجھے امید ہے کہ وہ بھی مضبوط ہوں گے اور پھر تمام نوجوان آگے آئیں گے”۔
قابل ذکر ہے کہ نڈال 2005 میں فرنچ اوپن جیتنے کے بعد سے ہر سال ٹورنامنٹ میں حصہ لے رہے ہیں۔ وہ اس ایونٹ میں اپنے 22 گرینڈ سلیم ٹائٹلز میں سے 14 جیتے ہیں۔
