آسمانی بجلی گرنے سے میاں بیوی سمیت ۴ہلاک

سرینگر//
جموں وکشمیر کے وسطی ضلع بڈگام کے خانصاحب اور پانپور میں آسمانی بجلی گرنے کے نتیجے میں جواں سال میاں بیوی سمیت۴؍افراد از جان ہوئے ۔
اطلاعات کے مطابق جنوبی ضلع پلوامہ کے بوجباغ پانپور میں ہفتے کی سہ پہر کو اس وقت سنسنی کا ماحول پھیل گیا جب آسمانی بجلی گرنے کے نتیجے میں میاں بیوی جھلس جانے سے زخمی ہوئے ۔
معلوم ہوا ہے کہ آس پاس موجود لوگوں نے زخمیوں کو طبی امداد کی خاطر نزدیکی ہسپتال منتقل کیا تاہم ڈاکٹروں نے میاں بیوی کو مردہ قرار دیا۔
متوفین کی شناخت۲۵سالہ ہلال احمد ہانجی اور اس کی بیوی کی پہچان روزی جان کے بطور کی گئی ہے ۔
جوں ہی جواں سال میاں بیوی کی لاشیں ان کے آبائی گاوں پہنچائی گئیں تو وہاں کہرام مچ گیا ، خواتین سینہ کوبی کرنے لگیں۔
دریں اثنا خانصاحب بڈگام میں ہفتے کے روز موسم نے کروٹ لی جس کے ساتھ ہی موسلا دھار بارشوں کا سلسلہ شروع ہوا۔
معلوم ہوا ہے کہ خانصاحب کے پہاڑی علاقے مجہ پتھری میں آسمانی بجلی گرنے کی وجہ سے خاتون سمیت دو افراد اس کی زد میں آئے جس کے نتیجے میں دونوں کی موت واقع ہوئی۔
ہلاک شدگان کی شناخت۵۷ سالہ محمد سلطان چوپان اور تاجہ بیگم زوجہ عبدالصمد چوپان ساکنان گرویٹھ کلان کے بطور ہوئی ہے ۔
ذرائع نے بتایا کہ پولیس اور ضلعی انتظامیہ کی ٹیمیں فوری طورپر جائے وقوع کی اور روانہ کی گئی۔
اس دوران پہاڑی ضلع شوپیاں کے متعدد علاقوں میں ہفتے کی سہ پہرکو موسلا دھا ربارشوں کے بیچ زور دار ژالہ بھاری ہوئی جس وجہ سے کھڑی فصلوں اور میوہ باغات کو نقصان پہنچا ہے ۔
اطلاعات کے مطابق ہفتے کی سہ پہر کو جنوبی کشمیر میں موسم نے کروٹ لی جس کے ساتھ ہی شدید ژالہ بھاری کا سلسلہ شروع ہوا۔
معلوم ہوا ہے کہ شوپیاں کے کاپرن‘ رے ، بٹہ گنڈ ، دانگام اور ملحقہ علاقوں میں شدید ژالہ بھاری سے کھڑی فصلوں، میوہ باغات اور سبزی باغوں کو کافی نقصان پہنچا ہے ۔
ذرائع نے بتایا کہ ژالہ بھاری سے میوہ جات بشمول سیب، ناشپاتی، خوبانی وغیرہ کے باغوں کو بھی نقصان پہنچنے کی اطلاعات موصول ہوئی ہے ۔
مقامی لوگوں نے بتایا کہ دس منٹ تک جاری رہنے والی ژالہ بھاری کی وجہ سے زمین پر تین انچ سفید پرت جمع ہوئی۔
ان کے مطابق کافی دیرتک ژالہ بھاری کی وجہ سے باغات کو نقصان پہنچا ہے ۔