نئی دہلی// عام آدمی پارٹی (آپ) نے پیر کو کہا کہ بھارتیہ جنتا پارٹی (بی جے پی) دہلی کے وزیر اعلی اروند کیجریوال کو سیاسی طور پر ختم کرنا چاہتی ہے ، اسی وجہ سے پارٹی ہر روز لیڈروں کے خلاف نئی ایف آئی آر درج کر رہی ہے ۔
آپ کے راجیہ سبھا ممبر راگھو چڈھا نے آج یہاں نامہ نگاروں کو بتایا کہ پارٹی لیڈر کے خلاف ہر روز ایک نئی ایف آئی آر درج کی جاتی ہے ۔ بی جے پی نے اس ملک میں دو قانون نافذ کیے ہیں۔ خاص طور پر اروند کیجریوال کی بڑھتی ہوئی مقبولیت کو دیکھتے ہوئے ایک قانون بنایا گیا ہے ۔ اس کے تحت اپوزیشن کے ہر لیڈر کے خلاف ایف آئی آر درج کی جا رہی ہے ۔
انہوں نے کہا کہ اس کی تازہ مثال گجرات میں دیکھنے کو ملی ہے ۔ آپ کے گجرات ریاستی کوآرڈینیٹر اسودن گدھوی کے خلاف وہاں ایف آئی آر درج کی گئی ہے ۔ بی جے پی کا یہ پہلا قانون اپوزیشن بالخصوص عام آدمی پارٹی پر لاگو ہوتا ہے ۔ وہیں دوسرے قانون کو بی جے پی اپنی پارٹی کے لوگوں کو بچانے کے لیے نافذ کرتی ہے ۔ سب سے بڑا جرم، ریپ کرنے والے ان کی پارٹی کے لیڈروں کے خلاف کوئی ایف آئی آر درج نہیں ہوتی۔
مسٹر چڈھا نے کہا کہ بی جے پی تمام آپ لیڈروں کے خلاف ایف آئی آر درج کرنا چاہتی ہے اور انہیں سلاخوں کے پیچھے ڈالنا چاہتی ہے کیونکہ آپ اور اروند کیجریوال میں اسے اپنی شکست نظر آتی ہے ۔ بی جے پی جانتی ہے کہ اگر کوئی اسے سیاسی طور پر ختم کرسکتا ہے تو وہ صرف اروند کیجریوال ہے ، اس لیے آپ کو ختم کرنے کی ہر ممکن کوشش کی جارہی ہے ۔
