مودی نے چھتیس گڑھ میں نکسلی حملے کی سخت مذمت کی

نئی دہلی// وزیر اعظم نریندر مودی نے آج چھتیس گڑھ کے بستر علاقے میں ماؤنوازوں کے حملے کی سخت مذمت کی اور اس حملے میں مارے گئے سیکورٹی فورسز کے 11 اہلکاروں کے اہل خانہ سے تعزیت کا اظہار کیا۔
مسٹر مودی نے اپنے ٹویٹ میں کہاکہ”میں دنتے واڑہ میں چھتیس گڑھ پولیس پر حملے کی سخت مذمت کرتا ہوں۔ ہم ان بہادر فوجیوں کو خراج عقیدت پیش کرتے ہیں جنہوں نے حملے میں اپنی جانیں گنوائیں۔ ان کی قربانی ہمیشہ یاد رکھی جائے گی۔ سوگوار خاندانوں سے میری تعزیت۔’’
نکسل متاثرہ دنتے واڑہ ضلع میں تلاشی آپریشن سے واپس آنے والی سیکورٹی فورسز کی ایک گاڑی کو آج دوپہر ایک آئی ای ڈی دھماکے میں ماؤنوازوں نے اڑا دیا جس میں ڈرائیور سمیت سیکورٹی فورسز کے 11 اہلکار ہلاک ہو گئے ۔ اطلاعات کے مطابق دھماکہ اتنا زور دار تھا کہ گاڑی کے پرخچے اڑ گئے اور سڑک پر گہرا گڑھا بن گیا، ایک طویل عرصے کے بعد ریاست میں نکسل حملے میں اتنی بڑی تعداد میں سیکورٹی فورسز کے جوان شہید ہوئے ہیں۔